ಸಿಂಗಾಪುರ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್ ಜಾಂಗ್ ಉನ್ ಇದೇ ಮೊದಲ ಬಾರಿಗೆ ಸಿಂಗಾಪುರದಲ್ಲಿ ನಡೆಯುತ್ತಿರುವ ಶೃಂಗಸಭೆಯಲ್ಲಿ ಮುಖಾಮುಖಿಯಾಗಿದ್ದಾರೆ. ಮಾತುಕತೆ ಇದೀಗ ಆರಂಭವಾಗಿದೆ. ವಿಶ್ವದ ವಿವಿಧ ದೇಶಗಳು ಈ ಮಾತುಕತೆಯ ಫಲಿತಾಂಶವನ್ನು ಕಾತರದಿಂದ ಎದುರು ನೋಡುತ್ತಿವೆ.
ಸಿಂಗಾಪುರದ ಸೆಂಟೋಸಾ ದ್ವೀಪದಲ್ಲಿರುವ ಕ್ಯಾಪೆಲ್ಲಾ ಹೋಟೆಲ್ ಪರಸ್ಪರ ಕೈ ಕುಲುಕಿ ನಗೆ ಬೀರಿದ ಇಬ್ಬರೂ ನಾಯಕರು, ಈ ಐತಿಹಾಸಿಕ ಭೇಟಿ ಯಶಸ್ಸು ಸಾಧಿಸಬಹುದು ಎಂಬ ಭರವಸೆ ಮೂಡಿಸಿದರು.
ಈ ವೇಳೆ ಮಾತನಾಡಿದ ಟ್ರಂಪ್, ‘ಈ ಭೇಟಿಯ ಮಹತ್ವ ನಮಗೆ ಗೊತ್ತಿದೆ. ಮಾತುಕತೆಯಲ್ಲಿ ಯಶಸ್ಸು ಸಾಧಿಸುತ್ತೇವೆ ಎಂಬ ಭರವಸೆ ಮೂಡುತ್ತಿದೆ. ಈ ಮೂಲಕ ಎರಡು ರಾಷ್ಟ್ರಗಳ ನಡುವೆ ಬಾಂಧವ್ಯ ವೃದ್ಧಿಯಾಗಲಿದೆ. ಇದರಲ್ಲಿ ಯಾವುದೇ ಅನುಮಾನವಿಲ್ಲ’ ಎಂದು ಪ್ರತಿಕ್ರಿಯಿಸಿದರು.
ಇದಕ್ಕೆ ಪ್ರತಿಕ್ರಿಯಿಸಿದ ಕಿಮ್, ‘ಇತಿಹಾಸದಲ್ಲಿ ನಾವು ಕಷ್ಟದ ಹಾದಿ ಸವೆಸಿದ್ದೇವೆ. ಹಲವು ಏರಿಳಿತಗಳನ್ನು ಕಂಡಿದ್ದೇವೆ. ಅವೆಲ್ಲವನನ್ನೂ ಎದುರಿಸಿ ಇಂದು ಇಲ್ಲಿಗೆ ಬಂದು ನಿಂತಿದ್ದೇವೆ’ ಎಂದು ಹೇಳಿದರು.
‘ಕಿಮ್ ಮೇಲೆ ನನಗೆ ನಂಬಿಕೆಯಿದೆ. ಇವರು ಪರಮಾಣು ಅಣ್ವಸ್ತ್ರ ಸಮಸ್ಯೆ ಹಾಗೂ ಗೊಂದಲವನ್ನು ಬಗೆಹರಿಸಲಿದ್ದಾರೆ. ಇದಕ್ಕಾಗಿ ಇಬ್ಬರು ಜತೆಗೂಡಿ ಪ್ರಯತ್ನಿಸಲಿದ್ದೇವೆ. ಪರಸ್ಪರ ಚರ್ಚೆಯ ಮೂಲಕ ಪರಿಹರಿಸಿಕೊಳ್ಳಬೇಕಾದ ಸಾಕಷ್ಟು ಸವಾಲುಗಳಿವೆ. ಈ ಶೃಂಗಸಭೆಯಿಂದ ಎರಡು ರಾಷ್ಟ್ರಗಳ ನಡುವಿನ ಸಂದೇಹಗಳು ಮರೆಯಾಗಲಿವೆ. ಶಾಂತಿ ನೆಲೆಸಲು ಸಾಧ್ಯವಾಗಲಿದೆ’ ಎಂದು ಟ್ರಂಪ್ ನುಡಿದರು.