ನವದೆಹಲಿ: ರಾಜಧಾನಿಯ ಖಾನ್‌ ಮಾರ್ಕೆಟ್‌ ಪ್ರದೇಶದ ಬಳಿ ಸಂಪೂರ್ಣ ಮಹಿಳಾ ಸಿಬ್ಬಂದಿಯನ್ನು ಒಳಗೊಂಡ ಎರಡು ‘ಪೊಲೀಸ್ ಪೋಸ್ಟ್‌’ಗಳು ಭಾನುವಾರ ಕಾರ್ಯಾರಂಭವಾದವು.
ದೆಹಲಿ ಲೆಫ್ಟಿನೆಂಟ್‌ ಗವರ್ನರ್‌ ವಿ.ಕೆ. ಸಕ್ಸೇನಾ ಹಾಗೂ ಪೊಲೀಸ್ ಕಮಿಷನರ್ ಸಂಜಯ್ ಅರೊರಾ ಈ ಪೊಲೀಸ್ ಕೇಂದ್ರಗಳನ್ನು ಉದ್ಘಾಟಿಸಿದರು.
‘ದೆಹಲಿ ಪೊಲೀಸರ ಈ ಐತಿಹಾಸಿಕ ಕೆಲಸವು ನನಗೆ ಸಂತಸ ತಂದಿದೆ. ತೊಂದರೆಗೆ ಒಳಗಾಗುವ ಮಹಿಳೆಯರು ಮುಕ್ತವಾಗಿ ತಮ್ಮ ಸಮಸ್ಯೆಗಳನ್ನು ಮಹಿಳಾ ಪೊಲೀಸರಲ್ಲಿ ಹೇಳಿಕೊಳ್ಳಬಹುದು’ ಎಂದು ಸಕ್ಸೇನಾ ಪ್ರತಿಕ್ರಿಯಿಸಿದರು.
ಗಣರಾಜ್ಯೋತ್ಸವದ ದಿನ ನಡೆದ ಪರೇಡ್‌ನಲ್ಲಿ ಮಹಿಳಾ ಶಕ್ತಿ ಪ್ರದರ್ಶನವಾಗಿತ್ತು. ಆ ದಿನವೇ ಎಲ್ಲ ಮಹಿಳಾ ಸಿಬ್ಬಂದಿಯೇ ಇರುವ ‘ಪೊಲೀಸ್ ಪೋಸ್ಟ್‌’ಗಳನ್ನು ಪ್ರಾರಂಭಿಸುವಂತೆ ದೆಹಲಿ ಪೊಲೀಸರಿಗೆ ಸಕ್ಸೇನಾ ಸಲಹೆ ನೀಡಿದ್ದರು.
