ಅಹಮದಾಬಾದ್: ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರು ತಾವು ಪ್ರತಿನಿಧಿಸುವ ಗಾಂಧಿನಗರ ಲೋಕಸಭಾ ಕ್ಷೇತ್ರದಲ್ಲಿ ಮಂಗಳವಾರ ಗಿಡಗಳನ್ನು ನೆಟ್ಟರು.
ಅಹಮದಾಬಾದ್ ಮಹಾನಗರ ಪಾಲಿಕೆಯ (ಎಎಂಸಿ) ವ್ಯಾಪ್ತಿಗೆ ಒಳಪಡುವ ಬೋಡಕ್ ದೇವ್ ಪ್ರದೇಶದ ಸಿಂಧು ಭವನ ರಸ್ತೆಯಲ್ಲಿ ಅಮಿತ್‌ ಶಾ ಅವರು ಮೂರು ಸಸಿಗಳನ್ನು ನೆಟ್ಟರು. ಈ ವೇಳೆ ಪಾಲಿಕೆಯ ಸದಸ್ಯರು ಉಪಸ್ಥಿತರಿದ್ದರು.
‘ಅಹಮದಾಬಾದ್ ನಗರವನ್ನು ವಿಶ್ವದ ಅತಿದೊಡ್ಡ ‘ಹಸಿರು ನಗರಿ’ಯನ್ನಾಗಿ ಮಾಡಲು ನಗರ ಪಾಲಿಕೆಯ ಸಂಪೂರ್ಣ ತಂಡ ಶ್ರಮಿಸಬೇಕು. ನಾಗರಿಕರೂ ಮೂರು–ನಾಲ್ಕು ಪೀಳಿಗೆಗೆ ಆಮ್ಲಜನಕ ನೀಡುವಂತಹ ವಿವಿಧ ಗಿಡಗಳನ್ನು ನೆಡಬೇಕು’ ಎಂದು ಅವರು ಕೋರಿದರು.
‘ಗಾಂಧಿನಗರ ಲೋಕಸಭಾ ಕ್ಷೇತ್ರದಲ್ಲಿ 11 ಲಕ್ಷ ಗಿಡಗಳನ್ನು ನೆಡುವ ಗುರಿಯನ್ನು ಹೊಂದಿದ್ದೇವೆ. ಇದಕ್ಕೆ ಸರ್ಕಾರಿ ಸಂಸ್ಥೆ ಮತ್ತು ಇಲಾಖೆಗಳೊಂದಿಗೆ ನಾಗರಿಕರೂ ಕೈ ಜೋಡಿಸಬೇಕು’ ಎಂದು ಅವರು ಕರೆ ನೀಡಿದರು.
