ಆರೋಗ್ಯ ಇಲಾಖೆ ನೌಕರರು ಎಂದು ಹೇಳಿಕೊಂಡ ಇಬ್ಬರಿಂದ ವ್ಯಾಪಾರಿ ಮಗನ ಅಪಹರಣ

ಆರೋಗ್ಯ ಇಲಾಖೆ ನೌಕರರು ಎಂದು ಹೇಳಿಕೊಂಡ ಇಬ್ಬರು ಮನೆಯೊಳಗೆ ಪ್ರವೇಶಿಸಿ, ಒಂದಿಷ್ಟು ಮಾಸ್ಕ್‌ ಮತ್ತು ಸ್ಯಾನಿಟೈಸರ್‌ಗಳನ್ನು ಕೊಟ್ಟರು.ಇನ್ನಷ್ಟು ಮಾಸ್ಕ್‌ಗಳು ಮತ್ತು ಸ್ಯಾನಿಟೈಸರ್‌ಗಳು ಬೇಕಿದ್ದರೆ ನಮ್ಮ ವಾಹನದ ಬಳಿಗೆ ಬರಬೇಕು ಎಂದು ಹೇಳಿದರು.

ಅವರ ಮಾತು ನಂಬಿದ ಕುಟುಂಬದ ಸದಸ್ಯರು ಬಾಲಕನನ್ನು ಅವರೊಂದಿಗೆ ಕಳುಹಿಸಿದರು. ಅದರೆ ಗಂಟೆ ಕಳೆದರೂ ಹುಡುಗ ಮನೆಗೆ ಬರಲಿಲ್ಲ. ಬದಲಿಗೆ ಒತ್ತೆ ಹಣಕ್ಕಾಗಿ ಬೆದರಿಕೆ ಕರೆ ಬಂತು ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಲಾಗಿದೆ.

'ಅಪಹರಣಕಾರರನ್ನು ಪತ್ತೆ ಮಾಡಲು ಕಾರ್ಯಾಚರಣೆ ಆರಂಭಿಸಲಾಗಿದೆ. ಇದಕ್ಕಾಗಿ ವಿಶೇಷ ಕಾರ್ಯಪಡೆಯು ಕಾರ್ಯಪ್ರವೃತ್ತವಾಗಿದೆ' ಎಂದು ಉತ್ತರ ಪ್ರದೇಶದ ಡಿಜಿಪಿ ಎಚ್‌.ಸಿ.ಅವಸ್ತಿ ಹೇಳಿದ್ದಾರೆ.