2001-07ರ ನಡುವೆ ಹಂಚಿಕೆಯಾದ 2ಜಿ ತರಂಗಾಂತರ ಕುರಿತು ಸಿಬಿಐ ಜುಲೈ ಮೊದಲ ವಾರದಲ್ಲಿ ಹೊಸದೊಂದು ಪ್ರಕರಣ ದಾಖಲಿಸಿಕೊಳ್ಳುವ ಸಾಧ್ಯತೆ ಇದೆ. ಅದಕ್ಕೂ ಮೊದಲು ಮಾರನ್ ಅವರನ್ನು ವಿಚಾರಣೆಗೆ ಗುರಿಪಡಿಸಬಹುದು ಎಂದು ಸಿಬಿಐ ಮೂಲಗಳು ತಿಳಿಸಿವೆ. ಇದೇ ವಿಚಾರವಾಗಿ ಸಿಬಿಐ ಈಗಾಗಲೇ ಏರ್‌ಸೆಲ್ ಮುಖ್ಯಸ್ಥ ಸಿ. ಶಿವಶಂಕರನ್ ಅವರ ಪ್ರಾಥಮಿಕ ವಿಚಾರಣೆ ನಡೆಸಿದೆ. ಏರ್‌ಸೆಲ್ ಕಂಪೆನಿಯನ್ನು ಮಲೆಷ್ಯಾ ಮೂಲದ ಉದ್ಯಮಿಯೊಬ್ಬರಿಗೆ ಮಾರಾಟ ಮಾಡುವಲ್ಲಿ ಮಾರನ್ ಅವರ ಪಾತ್ರವೂ ಇರುವ ಬಗ್ಗೆ ಶಿವಶಂಕರನ್ ಹೇಳಿಕೆ ನೀಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ ಎಂದು ಸುದ್ದಿಸಂಸ್ಥೆ ವರದಿ ಮಾಡಿದೆ.
