ಬ್ಯಾಂಕ್‌ಗಳಿಗೆ ₹ 824.15 ಕೋಟಿ ವಂಚಿಸಿದ ಕನಿಷ್ಕ್

ಚೆನ್ನೈ ಮೂಲದ ಕನಿಷ್ಕ್ ಗೋಲ್ಡ್ ಪ್ರೈ. ಲಿಮಿಟೆಡ್ (ಕೆಜಿಪಿಎಲ್) ಕಂಪನಿಯು ಸ್ಟೇಟ್ ಬ್ಯಾಂಕ್ ಆಫ್‌ ಇಂಡಿಯಾ (ಎಸ್‌ಬಿಐ) ಸೇರಿದಂತೆ 14 ಬ್ಯಾಂಕ್‌ಗಳಿಗೆ ₹ 824.15 ಕೋಟಿ ವಂಚನೆ ಮಾಡಿದೆ ಎಂದು ದೂರು ದಾಖಲಾಗಿದೆ.

ವಂಚನೆ ಸಂಬಂಧ ಚೆನ್ನೈನ ಎಸ್‌ಬಿಐ ಮಿಡ್ ಕಾರ್ಪೊರೇಟ್ ಪ್ರಾದೇಶಿಕ ಕಚೇರಿ–1ರ ಪ್ರಧಾನ ವ್ಯವಸ್ಥಾಪಕ ಜಿ.ಡಿ. ಚಂದ್ರಶೇಖರ್ ಅವರು ಸಿಬಿಐ ಜಂಟಿ ನಿರ್ದೇಶಕರಿಗೆ ಜನವರಿ 21ರಂದು ದೂರು ನೀಡಿದ್ದಾರೆ. ಹಗರಣದ ಬಗ್ಗೆ ಇನ್ನಷ್ಟೇ ಹೆಚ್ಚಿನ ಮಾಹಿತಿ ತಿಳಿಯಬೇಕಿದೆ.

ನೀಡಿದ್ದು ಸುಳ್ಳು ದಾಖಲೆ: ‘ಕನಿಷ್ಕ್ ಕಂಪನಿಯ ಪ್ರವರ್ತಕರು ಮತ್ತು ನಿರ್ದೇಶಕರಾದ ಭೂಪೇಶ್ ಕುಮಾರ್ ಜೈನ್ ಹಾಗೂ ಅವರ ಹೆಂಡತಿ ನೀತಾ ಜೈನ್ ಅವರು ಸಂಸ್ಥೆಯ ಹಣಕಾಸು ಮತ್ತು ವ್ಯವಹಾರಕ್ಕೆ ಸಂಬಂಧಿಸಿದಂತೆ ಸುಳ್ಳು ದಾಖಲೆಗಳನ್ನು ಬ್ಯಾಂಕ್‌ಗೆ ನೀಡಿ ಸಾಲ ಪಡೆದಿದ್ದಾರೆ. 2009ರಿಂದಲೂ ಇದೇ ರೀತಿ ಬ್ಯಾಂಕ್‌ನ ನಂಬಿಕೆಗೆ ದ್ರೋಹ ಮಾಡಲಾಗಿದೆ’ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

‘ಸಂಸ್ಥೆಯು ಬ್ಯಾಂಕ್‌ನ ಹಿತಕ್ಕೆ ಧಕ್ಕೆಯಾಗುವಂತೆ ಹಣವನ್ನು ಬಳಸಿಕೊಂಡಿದೆ. ರಾತ್ರೋರಾತ್ರಿ ತನ್ನ ಮಳಿಗೆಗಳನ್ನು ಮುಚ್ಚಿದೆ’ ಎಂದು ದೂರು ದಾಖಲಾಗಿದೆ.

ಎಫ್‌ಐಆರ್ ದಾಖಲಿಸಿಕೊಂಡು ಪ್ರಕರಣದ ತನಿಖೆ ಆರಂಭಿಸಿದ ಸಿಬಿಐ, ಭೂಪೇಶ್ ಕುಮಾರ್ ಜೈನ್ ಹಾಗೂ ನೀತಾ ಜೈನ್ ವಿರುದ್ಧ ಲುಕ್–ಔಟ್ ಸುತ್ತೋಲೆ ಹೊರಡಿಸಿದೆ.

ಜೈನ್ ದಂಪತಿ ಸದ್ಯ ಮಾರಿಶಸ್‌ನಲ್ಲಿ ಇದ್ದಾರೆ ಎನ್ನಲಾಗಿದೆ.

‌ವರ್ಷದ ಹಿಂದೇ ಅನುಮಾನ: 2017ರ ಮಾರ್ಚ್‌ನಲ್ಲಿ ಕೆಜಿಪಿಎಲ್ ಬಡ್ಡಿ ಕಟ್ಟಲು ತಡವಾಗಿತ್ತಲ್ಲದೇ ಅದರ ನಿರ್ದೇಶಕರು ಸಂಪರ್ಕಕ್ಕೆ ಲಭ್ಯರಾಗಿರಲಿಲ್ಲ. ಆಗಲೇ ವಂಚನೆಯ ಬಗ್ಗೆ ಮೊದಲ ಬಾರಿ ಅನುಮಾನ ಕಾಡಿದ್ದು.

ಸಾಲ ನೀಡಿದ ಬ್ಯಾಂಕ್‌ಗಳ ಸಿಬ್ಬಂದಿ ಚೆನ್ನೈ ಸುತ್ತಮುತ್ತ ಇರುವ ಕೆಜಿಪಿಎಲ್ ಕಚೇರಿ, ಕಾರ್ಖಾನೆ ಮತ್ತು ಮಳಿಗೆಗಳಿಗೆ ಭೇಟಿ ನೀಡಿದಾಗ ಅಲ್ಲಿ ಯಾವುದೇ ಚಟುವಟಿಕೆಗಳು ಕಂಡುಬರದೇ ಇರುವುದು ಅನುಮಾನಕ್ಕೆ ಪುಷ್ಟಿ ನೀಡಿತು.

ನಷ್ಟ ಭರ್ತಿಗೆ ಕೆಜಿಪಿಎಲ್ ಆಸ್ತಿಗಳನ್ನು ಜಪ್ತಿ ಮಾಡಲು ಬ್ಯಾಂಕ್‌ಗಳು ಮುಂದಾದಾಗ ಕೇವಲ ₹ 158.65 ಕೋಟಿ ಮೌಲ್ಯದ ಆಸ್ತಿಗಳನ್ನಷ್ಟೇ ಭದ್ರತೆಯಾಗಿ ಇರಿಸಿರುವುದು ತಿಳಿದಿದೆ. ಆಗ, ಕೆಜಿಪಿಎಲ್ ಸಾಲದ ಎಲ್ಲಾ ಖಾತೆಗಳೂ ನಕಲಿ ಎಂದು ಘೋಷಿಸಿ, ಪ್ರಕರಣ ದಾಖಲಿಸಲು ಬ್ಯಾಂಕ್‌ಗಳು ನಿರ್ಧರಿಸಿವೆ.

**

ಯಾರ‍್ಯಾರಿಗೆ ಎಷ್ಟು ನಷ್ಟ?

ಕೆಜಿಪಿಎಲ್‌ನಿಂದ ವಂಚನೆಗೊಳಗಾಗದ ಬ್ಯಾಂಕ್‌ಗಳಲ್ಲಿ ಎಸ್‌ಬಿಐ (₹ 240.46 ಕೋಟಿ) ಮೊದಲ ಸ್ಥಾನದಲ್ಲಿದೆ. ನಂತರದ ಸ್ಥಾನದಲ್ಲಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ (₹ 128.31 ಕೋಟಿ), ಯೂನಿಯನ್ ಬ್ಯಾಂಕ್ (₹ 54.94 ಕೋಟಿ), ಬ್ಯಾಂಕ್ ಆಫ್ ಇಂಡಿಯಾ (₹ 46.20 ಕೋಟಿ) ಐಸಿಐಸಿಐ ಬ್ಯಾಂಕ್, ಎಚ್‌ಡಿಎಫ್‌ಸಿ ಬ್ಯಾಂಕ್ ಮತ್ತು ಕಾರ್ಪೊರೇಷನ್ ಬ್ಯಾಂಕ್‌ಗಳಿವೆ.