ಚಿತ್ರದುರ್ಗ: ತಾಲ್ಲೂಕಿನ ಪವನ ವಿದ್ಯುತ್ ಸ್ಥಾವರದ ಗಾಳಿ ಯಂತ್ರವೊಂದರ ಎರಡು ರೆಕ್ಕೆಗಳು ತುಂಡು ತುಂಡಾಗಿ ನೆಲಕ್ಕೆ ಉರುಳಿದ ಬೆನ್ನಲೇ ಕೆಲ ಖಾಸಗಿ ಕಂಪನಿಗಳು ವೇಗವಾಗಿ ಗಾಳಿ ಬೀಸಿದರೆ ಯಂತ್ರಗಳನ್ನು ನಿಲ್ಲಿಸುತ್ತಿವೆ ಎಂಬ ಮಾಹಿತಿ ಲಭ್ಯವಾಗಿದೆ.
ತಾಲ್ಲೂಕಿನ ಕುರುಮರಡಿಕೆರೆ ಗ್ರಾಮ ಸಮೀಪದ ಬೆಟ್ಟದಲ್ಲಿ ಸೋಮವಾರ ವೇಗವಾಗಿ ಬೀಸಿದ ಗಾಳಿಗೆ ಗಾಳಿ ಯಂತ್ರವೊಂದರ ರೆಕ್ಕೆಗಳು ಬೀಳುವ ದೃಶ್ಯ ಮಂಗಳವಾರ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿತ್ತು. ಇದನ್ನು ಸೂಕ್ಷ್ಮವಾಗಿ ಪರಿಗಣಿಸಿರುವ ಸಂಬಂಧಪಟ್ಟ ಖಾಸಗಿ ಕಂಪನಿಗಳು ತಮ್ಮಸಿಬ್ಬಂದಿಗೆ ಗಾಳಿ ಹೆಚ್ಚಾದರೆ ನಿಲ್ಲಿಸುವಂತೆ ಸೂಚನೆ ನೀಡಿದ್ದಾರೆ ಎಂದು ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿರುವ ಹೆಸರು ಹೇಳಲಿಚ್ಛಿಸದ ಎಂಜಿನಿಯರ್ ತಿಳಿಸಿದ್ದಾರೆ.
‘ಮೊದಲು ಒಂದು ರೆಕ್ಕೆ ತುಂಡಾಗಿದ್ದು, ಅದು ಇನ್ನೊಂದರ ಮೇಲೆ ಬಿದ್ದ ಕಾರಣ ತುಂಡು ತುಂಡಾಗಿ ಬಿದ್ದಿರುವುದನ್ನು ನಾನು ವಿಡಿಯೊದಲ್ಲಿ ಗಮನಿಸಿದ್ದೇನೆ. 10 ದಿನಗಳಿಂದಲೂ ಜಿಲ್ಲೆಯ ಬೆಟ್ಟ, ಗುಡ್ಡಗಾಡು ಪ್ರದೇಶಗಳಲ್ಲಿ ಗಾಳಿಯ ಪ್ರಮಾಣ ಹೆಚ್ಚಿದೆ. ಪ್ರಕೃತಿ ವಿಕೋಪವೇ ಇದಕ್ಕೆ ಕಾರಣ’ ಎಂದಿದ್ದಾರೆ.
