ಡೀಸೆಲ್ ದರ ಇಳಿಸುವಂತೆ ಲಾರಿ ಮಾಲೀಕರ ಒತ್ತಾಯ

ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಘದ ಅಧ್ಯಕ್ಷ ಜಿ.ಆರ್.ಷಣ್ಮುಗಪ್ಪ, 'ಡೀಸೆಲ್ ದರ ಏರುತ್ತಿದೆ. ಸರ್ಕಾರ ಡೀಸೆಲ್ ಮೇಲೆ ಶೇ 24ರಷ್ಟು ದುಬಾರಿ ತೆರಿಗೆ ವಿಧಿಸುತ್ತಿದೆ. ಇದರಿಂದ ಲಾರಿ ಮಾಲೀಕರು ಪ್ರತಿ 100 ಲೀಟರ್‌ಗೆ ₹1,500 ಹೆಚ್ಚುವರಿ ತೆರಿಗೆ ಪಾವತಿಸಬೇಕಿದೆ. ₹3 ಕಡಿಮೆ ಮಾಡಿದರೆಲಾರಿ ಮಾಲೀಕರು ಹಾಗೂ ಸರ್ಕಾರಕ್ಕೂ ಅನುಕೂಲ' ಎಂದರು.

'ಲಾಕ್‍ಡೌನ್‍ನಿಂದ ವಹಿವಾಟು ನಡೆಸದೆ ಸ್ಥಗಿತಗೊಂಡಿರುವ ಲಾರಿಗಳಿಗೆ ದಂಡದೊಂದಿಗೆ ತೆರಿಗೆ ಕಟ್ಟುವಂತೆ ಸಾರಿಗೆ ಕಚೇರಿಗಳಲ್ಲಿ ಕಿರುಕುಳ ನೀಡಲಾಗುತ್ತಿದೆ. ಸೆಪ್ಟೆಂಬರ್‌ ವರೆಗೆ ತೆರಿಗೆ ವಿನಾಯಿತಿ ನೀಡಬೇಕು. 2021ರ ಮಾರ್ಚ್‍ವರೆಗೆ ಎಲ್ಲ ಟೋಲ್‍ಗಳನ್ನು ಸ್ಥಗಿತಗೊಳಿಸಬೇಕು. ವಾಹನ ಸಾಲದ ಕಂತು ಪಾವತಿಸಲು ಆಗಸ್ಟ್ ಅಂತ್ಯದವರೆಗೆ ಕಾಲಾವಕಾಶ ನೀಡಬೇಕು. ಲಾರಿ ಚಾಲಕರಿಗೂ ಸರ್ಕಾರ ಪ್ರೋತ್ಸಾಹಧನ ಹಾಗೂ ಆರೋಗ್ಯ ವಿಮೆ ಜಾರಿ ಮಾಡಬೇಕು' ಎಂದರು.