ತೆರಿಗೆ ಪಾಲು | ಕೇಂದ್ರ ರಾಜ್ಯ; ಜೋರು ವ್ಯಾಜ್ಯ

ಹಣಕಾಸು ಆಯೋಗದ ಮಧ್ಯಂತರ ವರದಿಯಲ್ಲಿ ಕರ್ನಾಟಕ ಮಾತ್ರವಲ್ಲ ತೆಲಂಗಾಣ, ಮಿಜೋರಾಂ ರಾಜ್ಯಗಳಿಗೂ ವಿಶೇಷ ಅನುದಾನಕ್ಕೆ ಶಿಫಾರಸು ಮಾಡಲಾಗಿತ್ತು. ಆದರೆ, ಅಂತಿಮ ವರದಿಯಲ್ಲಿ ಆ ವಿಷಯವೇ ಇಲ್ಲದ ಕಾರಣ ಎರಡೂ ರಾಜ್ಯಗಳು ಕೇಳಿಲ್ಲ.

ರಾಜ್ಯ ಸರ್ಕಾರಗಳು ಬಂಡವಾಳ ವೆಚ್ಚ ಮಾಡಲು ಕೇಂದ್ರ ಸರ್ಕಾರ ನೆರವು ಕೊಡಬೇಕೆಂಬ ಶಿಫಾರಸು ಹಣಕಾಸು ಆಯೋಗದ ವರದಿಯಲ್ಲಿ ಇರಲಿಲ್ಲ. ಆದರೆ,ಪ್ರಧಾನಿ ನರೇಂದ್ರ ಮೋದಿಯವರ ನಿರ್ಧಾರದಂತೆ 50 ವರ್ಷಗಳ ಮರುಪಾವತಿ ಅವಧಿಗೆ ರಾಜ್ಯಗಳಿಗೆ ಬಡ್ಡಿರಹಿತಸಾಲ ನೀಡಲಾಗಿದೆ. ಕರ್ನಾಟಕಕ್ಕೆ ₹ 8,035 ಕೋಟಿ ಬಡ್ಡಿರಹಿತ ಸಾಲ ದೊರಕಿದೆ.

ಈಗ ಹೊಸ ಹಣಕಾಸು ಆಯೋಗ ಅಸ್ತಿತ್ವದಲ್ಲಿದೆ.ಕರ್ನಾಟಕವೂ ಸೇರಿದಂತೆ ಎಲ್ಲ ರಾಜ್ಯಗಳ ಅಹವಾಲು
ಗಳನ್ನು ಆಯೋಗ ಆಲಿಸುತ್ತದೆ. ರಾಜ್ಯ ಸರ್ಕಾರ ತನ್ನ ವಾದವನ್ನು ಆಯೋಗದ ಮುಂದೆ ಮಂಡಿಸಿ,
ಪರಿಹಾರ ಪಡೆಯಲು ಅವಕಾಶ ಇದೆ.

ಕೇಂದ್ರದ ತೆರಿಗೆ ಪಾಲಿನ ಅನುದಾನವನ್ನು 15ನೇ ಹಣಕಾಸು ಆಯೋಗ ಶೇ 4.731ರಿಂದ ಶೇ 3.617ಕ್ಕೆ (ಶೇ 23) ಇಳಿಸಿದೆ. ಇದರ ಪರಿಣಾಮ ಪ್ರತಿವರ್ಷ ₹12 ಸಾವಿರದಿಂದ ₹13 ಸಾವಿರ ಕೋಟಿ ನಷ್ಟವಾಗುತ್ತಿದೆ. 15ನೇ ಹಣಕಾಸು ಆಯೋಗದ ಅವಧಿ 2026ರ ವರೆಗಿದ್ದು ಕನಿಷ್ಠ ₹62,098 ಕೋಟಿ ನಷ್ಟವಾಗುತ್ತದೆ.

ದೇಶದಲ್ಲಿ ತೆರಿಗೆ ಪಾವತಿಯಲ್ಲಿ ರಾಜ್ಯ 2ನೇ ಸ್ಥಾನದಲ್ಲಿದ್ದರೂ ಕೇಂದ್ರ ಸರ್ಕಾರ ದೊಡ್ಡ ಬರೆ ಹಾಕುತ್ತಿದೆ. 

ಕೇಂದ್ರಕ್ಕೇ ಸೆಸ್‌–ಸರ್‌ಚಾರ್ಜ್‌ ಹೋಗುತ್ತಿದ್ದು, ರಾಜ್ಯಕ್ಕೆ ಇದರಿಂದ ₹ 53,382 ಕೋಟಿ ನಷ್ಟವಾಗಿದೆ. ವಿಶೇಷ ಅನುದಾನದಲ್ಲಿ ₹ 11,495 ಕೋಟಿ ಸಹ ಲಭಿಸಿಲ್ಲ.

ಜಿಎಸ್‌ಟಿ, ಹಣಕಾಸು ಆಯೋಗದಿಂದ ಅನುದಾನ ಕಡಿತ, ಸೆಸ್‌ ಹಾಗೂ ಸರ್ಚಾಜ್‌, ವಿಶೇಷ ಅನುದಾನದಲ್ಲಿ ಒಟ್ಟಾರೆ ರಾಜ್ಯಕ್ಕೆ ₹ 1,85,468 ಕೋಟಿ ನಷ್ಟವಾಗಿದೆ. 

ಕೇಂದ್ರದ ಹಲವು ಯೋಜನೆಗಳಿಗೆ ರಾಜ್ಯವು ಶೇ 50ಕ್ಕಿಂತ ಹೆಚ್ಚಿನ ಅನುದಾನ ನೀಡುತ್ತಿದೆ. ಆದರೆ, ಎಲ್ಲ ಯೋಜನೆಗಳಿಗೂ ಪ್ರಧಾನಿ ಅವರ ಹೆಸರನ್ನೇ ನಾಮಕರಣ ಮಾಡಿಕೊಳ್ಳಲಾಗಿದೆ.