ಬರ್ಲಿನ್: ಎರಡನೇ ವಿಶ್ವಯುದ್ಧದ ಸಂದರ್ಭದಲ್ಲಿ ನಡೆದ 10,505 ಕೊಲೆಗಳಿಗೆ ಪ್ರೇರಕಳಾಗಿದ್ದಾಳೆ ಎಂಬ ಅಪರಾಧ ಪ್ರಕರಣದಲ್ಲಿ ಶಿಕ್ಷೆಗೆ ಗುರಿಯಾಗಿದ್ದ 99 ವರ್ಷದ ಮಹಿಳೆ ಸಲ್ಲಿಸಿದ್ದ ಮೇಲ್ಮನವಿಯನ್ನು ಜರ್ಮನ್ ಕೋರ್ಟ್ ಮಂಗಳವಾರ ತಿರಸ್ಕರಿಸಿದೆ.
ನಾಜಿ ಶಿಬಿರದ ಕಮಾಂಡರ್ನ ಕಾರ್ಯದರ್ಶಿಯಾಗಿದ್ದ ಇರ್ಮ್ಗರ್ಡ್ ಫರ್ಚ್ನರ್ ಈ ಎಲ್ಲ ಕೊಲೆಗಳಿಗೆ ಪ್ರೇರಕಳಾಗಿದ್ದಳು ಎಂಬ ಪ್ರಕರಣದಲ್ಲಿ ಸ್ಥಳೀಯ ಕೋರ್ಟ್ ಡಿಸೆಂಬರ್ 2022ರಲ್ಲಿ ಶಿಕ್ಷೆ ವಿಧಿಸಿತ್ತು. ಈ ತೀರ್ಪನ್ನು ಫೆಡರಲ್ ಕೋರ್ಟ್ ಎತ್ತಿಹಿಡಿದಿದೆ.
ಜರ್ಮನಿಯ ಪ್ರಮುಖ ಯಹೂದಿ ನಾಯಕ ಜೋಸೆಫ್ ಶ್ಯೂಸ್ಟರ್ ಕೋರ್ಟ್ ತೀರ್ಪನ್ನು ಸ್ವಾಗತಿಸಿದ್ದಾರೆ. ‘ಸಾಮೂಹಿಕ ಹತ್ಯೆ ನಡೆದ 80 ವರ್ಷಗಳ ನಂತರವೂ ನಾಜಿಯ ಕೃತ್ಯವನ್ನು ಅಲ್ಲಗಳೆಯದೆ ನ್ಯಾಯಾಂಗ ವ್ಯವಸ್ಥೆಯು ಮಹತ್ವದ ಸಂದೇಶ ಸಾರಿದೆ’ ಎಂದು ಹೇಳಿದ್ದಾರೆ.
