ಜಾಕ್ಸನ್‌ವಿಲ್ಲೆ: ಅಮೆರಿಕದಲ್ಲಿ ಬಂದೂಕುಧಾರಿ ಶ್ವೇತ ವರ್ಣೀಯನೊಬ್ಬ ಮೂವರು ಕಪ್ಪು ವರ್ಣೀಯರನ್ನು ಗುಂಡಿಕ್ಕಿ ಕೊಂದ ಘಟನೆ ಫ್ಲಾರಿಡಾದ ಜಾಕ್ಸನ್‌ವಿಲ್ಲೆಯಲ್ಲಿ ನಡೆದಿದೆ.
ಇಲ್ಲಿನ ಡಾಲರ್‌ ಜನರಲ್‌ ಸ್ಟೋರ್‌ನಲ್ಲಿ ಶನಿವಾರ ರಾತ್ರಿ ಈ ಘಟನೆ ನಡೆದಿದೆ ಎಂದು ಸ್ಥಳಿಯ ಪೊಲೀಸ್‌ ಅಧಿಕಾರಿ ಟಿ.ಕೆ. ವಾಟರ್ಸ್‌ ಹೇಳಿದ್ದಾರೆ.
ಈ ಘಟನೆ ಬಳಿಕ ಬಂದೂಕುಧಾರಿ ವ್ಯಕ್ತಿ ತನಗೆ ತಾನೇ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಇದೊಂದು ಜನಾಂಗೀಯ ಪ್ರೇರಿತ ದಾಳಿಯಂತೆ ತೋರುತ್ತಿದೆ ಎಂದು ವಾಟರ್ಸ್‌ ತಿಳಿಸಿದ್ದಾರೆ.
ಬಂದೂಕುಧಾರಿಯು 20 ವರ್ಷದ ಯುವಕನಾಗಿದ್ದು, ಈ ಕೃತ್ಯಕ್ಕೆ ಗ್ಲಾಕ್‌ ಗನ್‌ ಮತ್ತು ಎಆರ್‌–15 ಎಂಬ ಅರೆ ಸ್ವಯಂಚಾಲಿತ ಬಂದೂಕು ಬಳಸಿದ್ದಾನೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಈ ಕೃತ್ಯ ಎಸಗಿದ ವ್ಯಕ್ತಿ ಕಪ್ಪು ವರ್ಣದವರನ್ನು ದ್ವೇಷಿಸುತ್ತಿದ್ದ. ಆತ ಯಾವುದೇ ಸಂಘಟನೆಗೆ ಸೇರಿದ್ದಾನೆ ಎಂಬುದಕ್ಕೆ ಖಚಿತ ಸಾಕ್ಷ್ಯವಿಲ್ಲ ಎಂದು ವಾಟರ್ಸ್‌ ತಿಳಿಸಿದ್ದಾರೆ.
