ವಿಶ್ವಸಂಸ್ಥೆ: ಭಾರತವು ಮುಂದಿನ ವರ್ಷ ವಿಶ್ವದಲ್ಲೇ ಅತಿಹೆಚ್ಚು ಜನಸಂಖ್ಯೆ ಹೊಂದಿರುವ ರಾಷ್ಟ್ರವಾಗಿ ಹೊರಹೊಮ್ಮಿ, ಚೀನಾವನ್ನು ಹಿಂದಿಕ್ಕಿದಲ್ಲಿ, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಶಾಶ್ವತ ಸದಸ್ಯ ಸ್ಥಾನ ನೀಡಬೇಕು ಎಂಬ ಅದರ ಬೇಡಿಕೆಗೆ ಹೆಚ್ಚು ಬಲ ಸಿಗಲಿದೆ ಎಂದು ವಿಶ್ವಸಂಸ್ಥೆಯ ಜನಸಂಖ್ಯೆ ವಿಭಾಗದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
‘ಅತಿಹೆಚ್ಚು ಜನಸಂಖ್ಯೆ ಹೊಂದಿರುವ ರಾಷ್ಟ್ರವಾಗಿ ಭಾರತ ಹೊರಹೊಮ್ಮಿದರೆ, ಜಾಗತಿಕ ಮಟ್ಟದಲ್ಲಿ ಅದರ ಕೆಲ ಬೇಡಿಕೆಗಳಿಗೆ ಹೆಚ್ಚು ಬಲ ಸಿಗಲಿದೆ’ ಎಂದು ಜನಸಂಖ್ಯೆ ವಿಭಾಗದ ಆರ್ಥಿಕ ಮತ್ತು ಸಾಮಾಜಿಕ ವ್ಯವಹಾರಗಳ ನಿರ್ದೇಶಕ ಜಾನ್ ವಿಲ್‌ಮಾಥ್ ಹೇಳಿದ್ದಾರೆ.
‘ಭದ್ರತಾ ಮಂಡಳಿಯ ಶಾಶ್ವತ ಸದಸ್ಯ ಸ್ಥಾನ ನೀಡಬೇಕು ಎಂಬುದು ಭಾರತದ ಬಹುದಿನಗಳ ಬೇಡಿಕೆ. ಈಗ ದೇಶದ ಜನಸಂಖ್ಯೆ ಹೆಚ್ಚಿದಲ್ಲಿ, ತನ್ನ ಈ ಬೇಡಿಕೆ ಈಡೇರಿಕೆಗೆ ಭಾರತ ಮತ್ತಷ್ಟು ಗಟ್ಟಿಯಾಗಿ ಧ್ವನಿ ಎತ್ತಬಹುದಾಗಿದೆ’ ಎಂದು ಪ್ರತಿಪಾದಿಸಿದರು.
