ದುಬೈ: ದುಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸಂಚರಿಸಿದ ಪ್ರಯಾಣಿಕರ ಸಂಖ್ಯೆಯಲ್ಲಿ ಭಾರತೀಯರು ಅಗ್ರಸ್ಥಾನದಲ್ಲಿದ್ದಾರೆ ಎಂದು ವಿಮಾನ ನಿಲ್ದಾಣದ ಪ್ರಕಟಣೆ ತಿಳಿಸಿದೆ.
2023ರ ಸಾಲಿನಲ್ಲಿ ದುಬೈ ನಿಲ್ದಾಣದ ಮೂಲಕ ಒಟ್ಟು 8.69 ಕೋಟಿ ಮಂದಿ ಪ್ರಯಾಣಿಸಿದ್ದಾರೆ. ಇದರಲ್ಲಿ ಭಾರತದ ಪ್ರಯಾಣಿಕರ ಸಂಖ್ಯೆ 1.19 ಕೋಟಿಯಷ್ಟಿದೆ ಎಂದು ಸೋಮವಾರ ಬಿಡುಗಡೆಗೊಳಿಸಿದ ಅಂಕಿ–ಅಂಶ ತಿಳಿಸಿದೆ.
ಪ್ರಯಾಣಿಕರ ಸಂಖ್ಯೆಯಲ್ಲಿ ಸೌದಿ ಅರೇಬಿಯಾ (67 ಲಕ್ಷ ಪ್ರಯಾಣಿಕರು), ಭಾರತದ ಬಳಿಕ ಎರಡನೇ ಸ್ಥಾನದಲ್ಲಿದೆ. ಬ್ರಿಟನ್ (59 ಲಕ್ಷ), ಪಾಕಿಸ್ತಾನ (42 ಲಕ್ಷ), ಅಮೆರಿಕ (36 ಲಕ್ಷ), ರಷ್ಯಾ (25 ಲಕ್ಷ) ಮತ್ತು ಜರ್ಮನಿ (25 ಲಕ್ಷ) ಬಳಿಕದ ಸ್ಥಾನಗಳಲ್ಲಿವೆ.
ದುಬೈ ನಿಲ್ದಾಣದಿಂದ 104 ದೇಶಗಳ 262 ತಾಣಗಳಿಗೆ ವಿಮಾನ ಸಂಪರ್ಕ ಇದ್ದು, ಒಟ್ಟು 102 ವಿಮಾನಯಾನ ಕಂಪನಿಗಳು ಕಾರ್ಯಾಚರಿಸುತ್ತಿವೆ.
