ಮನಿಲಾ: ಉತ್ತರ ಫಿಲಿಪೀನ್ಸ್‌ಗೆ ಬುಧವಾರ ಅಪ್ಪಳಿಸಿದ ಪ್ರಬಲ ಚಂಡಮಾರುತ ‘ದೊಕ್ಸುರಿ’ ಗೆ ಇಬ್ಬರು ಬಲಿಯಾಗಿದ್ದಾರೆ. ಮರಗಳು ಉರುಳಿ ಬಿದ್ದಿದ್ದು, ವಿದ್ಯುತ್ ಸಂಪರ್ಕ ಕಡಿತವಾಗಿದೆ. ಅಲ್ಲದೆ ಸಾವಿರಾರು ಜನರು ಆಶ್ರಯ ಕಳೆದುಕೊಂಡಿದ್ದು, ನಿರಾಶ್ರಿತರ ಕೇಂದ್ರದಲ್ಲಿ ಆಶ್ರಯ ಪಡೆದಿದ್ದಾರೆ.
ಇಸಾಬೆಲಾ ಉತ್ತರ ಪ್ರಾಂತ್ಯದ ರಾಮನ್ ಪುರಸಭೆಯಲ್ಲಿ ಬುಧವಾರ ಚಂಡಮಾರುತದ ಗಾಳಿಗೆ ತೆಂಗಿನ ಮರ ಬಿದ್ದು ಸೈಕಲ್‌ನಲ್ಲಿ ಬ್ರೆಡ್ ಮಾರುತ್ತಿದ್ದ ಮಹಿಳೆ ಮೃತರಾಗಿದ್ದಾರೆ. ಬಾಗುಯೋ ನಗರದಲ್ಲಿ ಮನೆಯ ಮೇಲೆ ಬೆಟ್ಟ ಕುಸಿದಿದ್ದರಿಂದ 17 ವರ್ಷದ ಯುವಕ ಮೃತನಾಗಿದ್ದಾನೆ ಎಂದು ಪ್ರಾಂತೀಯ ವಿಪತ್ತು ಅಧಿಕಾರಿಗಳು ತಿಳಿಸಿದ್ದಾರೆ.
ಗಂಟೆಗೆ 175 ಕಿ.ಮೀ ವೇಗ ಪಡೆದುಕೊಂಡಿರುವ ಚಂಡಮಾರುತ ಬುಧವಾರ ದಲುಪಿರಿ, ಫೂಗಾ ಮತ್ತು ಲುಜೋನ್ ದ್ವೀಪಗಳಿಗೆ ಅಪ್ಪಳಿಸಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.
