ಲಂಡನ್ (ಪಿಟಿಐ): ಹಿಂಸಾಚಾರ ನಡೆಸುತ್ತಿದ್ದವರಿಂದ ತಮ್ಮ ಸಮುದಾಯವನ್ನು ರಕ್ಷಿಸಲು ಹೋದ ಮೂವರು ಏಷ್ಯಾ ಮೂಲದ ಇಂಗ್ಲೆಂಡ್ ಪ್ರಜೆಗಳು ವೇಗವಾಗಿ ಬಂದ ಕಾರು ಡಿಕ್ಕಿ ಹೊಡೆದ ಪರಿಣಾಮ ಸ್ಥಳದಲ್ಲೇ ಮೃತಪಟ್ಟ ಘಟನೆ ಬರ್ಮಿಂಗ್ಹ್ಯಾಮ್ನಲ್ಲಿ ಮಂಗಳವಾರ ತಡರಾತ್ರಿ ನಡೆದಿದೆ.
ಈ ಮೂವರೂ ಅಪಘಾತದಿಂದಾಗಿ ಸಾವನ್ನಪ್ಪಿದರೂ ಪೊಲೀಸರು ಇದನ್ನು ಕೊಲೆ ಪ್ರಕರಣವೆಂದೇ ಪರಿಗಣಿಸಿದ್ದಾರೆ.
ಮೃತಪಟ್ಟ ಮೂವರಲ್ಲಿ ಇಬ್ಬರು ಸಹೋದರರಾಗಿದ್ದು ಷಹಜಾದ್ ಮತ್ತು ಹ್ಯಾರಿ ಹುಸೇನ್ ಎಂದು ಗುರುತಿಸಲಾಗಿದೆ. ಮತ್ತೊಬ್ಬ ವ್ಯಕ್ತಿ ಇವರ ಸ್ನೇಹಿತ ಮೂಸವರ್ ಅಲಿ ಎಂದು ತಿಳಿದು ಬಂದಿದೆ.
ಲಂಡನ್ನಲ್ಲಿ ಆರಂಭಗೊಂಡಿದ್ದ ಲೂಟಿ, ಹಿಂಸಾಚಾರ ಬರ್ಮಿಂಗ್ಹ್ಯಾಮ್ಗೂ ಮಂಗಳವಾರ ವ್ಯಾಪಿಸಿ ತೀವ್ರ ಸ್ವರೂಪ ಪಡೆದುಕೊಂಡಿತ್ತು.