ಆಗ ಕುಗ್ರಾಮ, ಈಗ ನೀರಿನ ಪಾಠ ಶಾಲೆ!

ಸತಾರಾದ ದಂತವೈದ್ಯ, ಜಲತಜ್ಞ ಡಾ.ಅವಿನಾಶ್ ಪೋಲ್ ಅವರ ಮಾರ್ಗದರ್ಶನ ಈ ಗ್ರಾಮ ಕೋರಿಕೊಂಡದ್ದು ಹಿಂದಿನ ವರ್ಷ. ‘ಶ್ರಮದಾನಕ್ಕೆ ನೀವು ಸಿದ್ಧರಾದರೆ ನಾನು ಒಂದು ದಿನ ಬಂದು ಮುಂದಿನ ದಾರಿ ಹೇಳಿಕೊಡುತ್ತೇನೆ’ ಎಂದರು ಪೋಲ್. ಊರಿಡೀ ಎದ್ದು ನಿಂತಿತು. ಡಾಕ್ಟರರ ಸಲಹೆಯಂತೆ ಮಳೆ ತಡೆಯಲು ಅಲ್ಲಲ್ಲಿ ಸೂಕ್ತ ರಚನೆ ಮಾಡಿತು. ಜತೆಗೆ ಪಾನಿ ಫೌಂಡೇಶನಿನ ‘ಸತ್ಯಮೇವ ಜಯತೆ’ ವಾಟರ್ ಕಪ್ – 1 ರಲ್ಲಿ ಭಾಗವಹಿಸಿತು. ಇದು 2016ರ ಸಾಲಿನ ಬೆಳವಣಿಗೆ.

 

ಜೂನ್ ತಿಂಗಳಲ್ಲಿ ನಾವು ಭೇಟಿ ಕೊಟ್ಟಾಗ ಆಗಷ್ಟೇ ಮೊದಲ ಮೂರು ಸೆಂಟಿಮೀಟರ್ ಮಳೆ ಸುರಿದಿತ್ತು. ಗುಡ್ಡ ನೆತ್ತಿಯಿಂದ ಆರಂಭಿಸಿ ಎಲ್ಲಿ ನೋಡಿದರೂ ಸೀಸಿಟಿ (ಕಂಟಿನ್ಯುವಸ್ ಕಂಟೂರ್  ಟ್ರೆಂಚ್  - ಉದ್ದನೆಯ ಸಮತಳ ಕಣಿ), ಆಳದ ಸಮತಳ ಕಣಿ, ಕೆಳಗೆ ಬಂದಂತೆಲ್ಲಾ ಲೂಸ್ ಬೋಲ್ಡರ್ ಬಂಡ್ (ಎಲ್ ಬಿ ಎಸ್ – ಬಿಡಿ ಕಲ್ಲುಗಳ ತಡೆಗಟ್ಟ), ಮಾತಿ ಬಾಂದ್ (ಮಣ್ಣಿನ ಕಟ್ಟ) ಮೊದಲಾದ ರಚನೆಗಳು.

 

ಅಷ್ಟರಲ್ಲೇ ಬತ್ತಿದ ಬಾವಿಗಳಲ್ಲಿ ನೀರು ಕಾಣಿಸಿಕೊಂಡು ಹಳ್ಳಿ ಟ್ಯಾಂಕರುಗಳಿಗೆ ವಿದಾಯ ಹೇಳಿತ್ತು. ಕೃಷಿಕರು ಉತ್ಸಾಹದಿಂದ ಬ್ಯಾಂಕ್ ಸಾಲ ಪಡೆದು ಹನಿ ನೀರಾವರಿ ಅಳವಡಿಸಹೊರಟಿದ್ದರು. ಇಡೀ ಗ್ರಾಮಕ್ಕೊಂದು ಸುತ್ತು ಹಾಕಿ ಹಿಂತಿರುಗಿದಾಗ ಡಾಕ್ಟರ್ ಉದ್ಗರಿಸಿದ್ದೇನು ಗೊತ್ತೇ? ‘ಇನ್ನು ಎಂದೆಂದಿಗೂ ಬರ ಈ ಗ್ರಾಮವನ್ನು  ಬಾಧಿಸದು’.