ಶುಕ್ರವಾರ, ಮಾರ್ಚ್ 5, 2021
23 °C

ಸದನ ಸಂಗತಿ!

ಎಸ್.ಬಿ.ರಂಗನಾಥ್ Updated:

ಅಕ್ಷರ ಗಾತ್ರ : | |

Prajavani

ಮನೆ ಹೆಸರು ‘ಆನಂದ ಸದನ’ ಎಂದಿದ್ದರೂ ‘ಸೀಸಿ’- ಅಂದ್ರೆ ಸೀನಿಯರ್ ಸಿಟಿಜನ್ ಗುಂಡಣ್ಣನವರಿಗೆ ಜೀವನ ಅಷ್ಟೇನೂ ಆನಂದದಾಯಕ ಆಗಿರಲಿಲ್ಲ. ‘ಮನೆಯಲ್ಲಿರಿ, ಸುರಕ್ಷಿತವಾಗಿರಿ’ ಎಂಬ ಕೊರೊನಾ ಸಂಹಿತೆ ಜೊತೆಗೆ ‘ಟೀವಿಯ ಮುಂದೆ’ ಎಂಬುದನ್ನು ಸೇರಿಸಿಕೊಂಡು ಅದರಲ್ಲಿ ತಲ್ಲೀನರಾಗಿದ್ದವರನ್ನು ಶ್ರೀಮತಿ ಗದರಿಸಿದರು- ‘ಒಳಗೆ ನೊಣ ಹೋದಾವು. ಹಂಗೆ ಬಾಯ್ಬಿಟ್ಕೊಂಡು ಅದೇನು ನೋಡ್ತಿದೀರಿ?’

‘ನೋಡು ಬಾ ಇಲ್ಲಿ. ಅರವತ್ತು ವರ್ಷದ ಸವದತ್ತಿ ಅಜ್ಜಿ ಹೇಗೆ ಸ್ಟೆಪ್ ಹಾಕ್ತಿದೆ!’

‘ಯಾರ‍್ರೀ ಆ ಎಲ್ಲಮ್ಮ?’

‘ಎಲ್ಲಮ್ಮ ಅಲ್ವೇ... ಅನ್ನಪೂರ್ಣಮ್ಮ. ಟಿ.ವಿ ಡ್ಯಾನ್ಸ್ ಸ್ಪರ್ಧೇಲಿ ಹುಡುಗ್ರ ಜೊತೆ ಆಯ್ಕೆಯಾಗಿದಾರೆ!’

‘ಯಾವಾಗ್ಲೂ ಟೀವಿ ಮುಂದೆ ಬೇರು ಬಿಟ್ಟು ಹೊಟ್ಟೆ ಬೆಳಸ್ಕೊಂಡಿದೀರಿ... ತಡೀರಿ ಮೊಮ್ಮಕ್ಕಳು, ಮಗ ಬರಲಿ’.

‘ಮಾರಾಯ್ತೀ, ನಾನೇನೂ ಬ್ಲೂಫಿಲಂ ನೋಡ್ತಿಲ್ಲ. ಇದನ್ನು ಸಭಾಪತಿಯವರಂತೆ ನಮ್ಮ ಸದನದ ನೀತಿ ನಿರೂಪಣಾ ಸಮಿತಿಗೆ ವಹಿಸಬೇಡ’.

‘ವಯಸ್ಸಾದ್ರೂ ನಿಮ್ಗೆ ಬುದ್ಧಿ ಮಾತ್ರ ಬರ್ಲಿಲ್ಲ’.

‘ಇದು ವಯಸ್ಸಾದವರ ಕಾಲಾನೇ, ದೊಡ್ಡಣ್ಣ ಅಮೆರಿಕದ ಹೊಸ ಅಧ್ಯಕ್ಷರಿಗೆ 78 ವರ್ಷ. ನಮ್ಮ ರಾಜಾಹುಲಿ ಅವ್ರಿಗಿಂತ ಒಂದ್ವರ್ಷ ಮಾತ್ರ ಚಿಕ್ಕೋರು. ದೊಡ್ಡಗೌಡರಿಗೆ 87. ರಾಜಕೀಯ ಇನಿಂಗ್ಸ್‌ನಲ್ಲಿ ಇನ್ನೂ ನಾಟೌಟ್...’

ಅಷ್ಟರಲ್ಲಿ ಬಂದ ಮೊಮ್ಮಗಳು ಕೇಳಿದಳು- ‘ತಾತಾ, ಬರೀ ಗಂಡಸ್ರೇ ಯಾಕೆ? ರಜನಿ ಚಾಂಡಿ ಇಲ್ವೇ?’

‘ಯಾರಮ್ಮಾ ಆಕೆ?’ ಅಜ್ಜಿ ಕೇಳಿದರು.

‘ಕೇರಳದ 68 ವರ್ಷದ ಸೆಲೆಬ್ರಿಟಿ. ಅವರ ಗ್ಲಾಮರಸ್ ಫೋಟೊ ಶೂಟ್ ವೈರಲ್ ಆಗಿತ್ತು’.

ಗುಂಡಣ್ಣ ಸೇರಿಸಿದರು- ‘84 ವರ್ಷವಾದ್ರೂ ವೈಜಯಂತಿಮಾಲಾ ಭರತನಾಟ್ಯ ಮಾಡ್ತಿಲ್ವೇ?! 72 ವರ್ಷದ ಡ್ರೀಮ್ ಗರ್ಲ್ ಹೇಮಾಮಾಲಿನಿ ಟೀವೀಲಿ ಮಿಂಚ್ತಿದಾರಲ್ಲ. ಲೈಫ್ ಎಂಜಾಯ್ ಮಾಡೋಕೆ ವಯಸ್ಸು ಅಡ್ಡಿಯಾಗಬಾರದು...’ ಎಂದರು ಗುಂಡಣ್ಣ, ಶ್ರೀಮತಿಯವರತ್ತ ತುಂಟನಗೆ ಬೀರಿ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.