ಮಂಗಳವಾರ, ಅಕ್ಟೋಬರ್ 20, 2020
22 °C

ಸರ್ಕಾರ, ಸಂಸಾರ!

ಬಿ.ಎನ್. ಮಲ್ಲೇಶ್ Updated:

ಅಕ್ಷರ ಗಾತ್ರ : | |

Prajavani

ಗಂಡ ತೆಪರೇಸಿಯ ಕೊರಳಪಟ್ಟಿ ಹಿಡಿದು ಠಾಣೆಗೆ ಎಳೆದುಕೊಂಡು ಬಂದ ಹೆಂಡತಿ ಪಮ್ಮಿ, ಅವನನ್ನು ಇನ್‌ಸ್ಪೆಕ್ಟರ್‌ ಎದುರು ನಿಲ್ಲಿಸಿ ‘ಸಾರ್, ಇವರು ಹದಿನೈದು ದಿನ ಮನೆ ಬಿಟ್ಟು ಹೋಗಿದ್ರು. ಎಲ್ಲಿಗೆ ಹೋಗಿದ್ರಿ ಅಂದ್ರೆ ಮುಂಬೈಗೆ ಅಂತಾರೆ. ಯಾಕೆ, ಏನು ಸ್ವಲ್ಪ ವಿಚಾರಿಸಿ’ ಎಂದು ಅಬ್ಬರಿಸಿದಳು.

ಇನ್‌ಸ್ಪೆಕ್ಟರ್‌ಗೆ ಗಾಬರಿಯಾಯಿತು. ‘ಸ್ವಲ್ಪ ಇರಮ್ಮ’ ಎಂದವರೇ ತೆಪರೇಸಿಯನ್ನು ಪ್ರಶ್ನಿಸಿದರು. ‘ಹದಿನೈದು ದಿನ ಮುಂಬೈಗೆ ಯಾಕಯ್ಯ ಹೋಗಿದ್ದೆ? ಅಲ್ಲೇನು ಮಾಡ್ತಿದ್ದೆ?’

‘ಅತೃಪ್ತ ಶಾಸಕರ ಜೊತೆ ಇದ್ದೆ ಸಾ, ಅವರಿಗೆ ಅದೂ ಇದೂ ತಂದು ಕೊಡೋದು, ದೇವಸ್ಥಾನಕ್ಕೆ ಕರ್ಕೊಂಡ್ ಹೋಗೋದು ಇತ್ಯಾದಿ ಹೆಲ್ಪ್ ಮಾಡ್ತಿದ್ದೆ’ ತೆಪರೇಸಿ ಬೆವರೊರೆಸಿಕೊಳ್ಳುತ್ತ ಹೇಳಿದ.

‘ಸುಳ್ಳು ಸಾರ್, ಇವರು ಒಂದು ದಿನಾನೂ ಅವರ ಜೊತೆ ಟಿ.ವಿ.ಯಲ್ಲಿ ಕಾಣಿಸ್ಲಿಲ್ಲ. ಇವರು ಎಲ್ಲಿದ್ರು, ಯಾರ ಜೊತೆ ಇದ್ರು ಎಲ್ಲ ನಂಗೆ ಗೊತ್ತು’ ಪಮ್ಮಿ ವಾದಿಸಿದಳು.

‘ನೀನೂ ಅತೃಪ್ತ ಏನಯ್ಯ?’ ಇನ್‌ಸ್ಪೆಕ್ಟರ್‌ ಪ್ರಶ್ನೆ.

‘ನಂಗೆ ಅತೃಪ್ತಿ ಇಲ್ಲ ಸಾ, ಸ್ವಾಭಿಮಾನಕ್ಕೆ ಹೋಗಿದ್ದೆ. ಮನೇಲಿ ನಂಗೆ ಅಧಿಕಾರ ಇಲ್ಲ ಸಾ, ಅದ್ಕೆ...’ ತೆಪರೇಸಿ ಬಾಯಿಬಿಟ್ಟ.

‘ಏನಮ್ಮ ಇದು? ಗಂಡನಿಗೆ ಅಧಿಕಾರ ಕೊಡೋದಲ್ವ? ಎಲ್ಲ ನೀವೇ ನಡೆಸಿದ್ರೆ ಹೆಂಗೆ?’ ಇನ್‌ಸ್ಪೆಕ್ಟರ್‌ ಆಕ್ಷೇಪಿಸಿದರು.

‘ಅದ್ಕೆ ಆ ಕಮಲಳ ಜೊತೆ ಇವರು ಮುಂಬೈಗೆ ಹೋಗೋದು ಸರಿನಾ ಸಾ?’

‘ತಪ್ಪು’ ಎಂದ ಇನ್‌ಸ್ಪೆಕ್ಟರ್‌ ‘ಏಯ್ ದಫೇದಾರ್ ಇವನನ್ನ ಒದ್ದು ಒಳಗೆ ಹಾಕ್ರಿ’ ಎಂದರು.

‘ಇದು ಅನ್ಯಾಯ ಸಾ, ನನ್ ತರಾನೆ ಆ ಅತೃಪ್ತ ಶಾಸಕರೂ ಹದಿನೈದು ದಿನ ಮುಂಬೈನಲ್ಲಿದ್ರು. ಅವರಿಗೂ ಶಿಕ್ಷೆ ಕೊಡಿಸೋಕೆ ಆಗುತ್ತಾ ನಿಮಗೆ?’ ತೆಪರೇಸಿ ಗರಂ ಆದ.

‘ಏಯ್ ನಿಂದು ಸಂಸಾರ, ಅವರದು ಸರ್ಕಾರ ಕಣಯ್ಯ...’

‘ಎರಡೂ ಒಂದೇ ಸಾ. ಇಲ್ಲಿ ಕೇಳೋರಿದಾರೆ, ಅಲ್ಲಿ ಕೇಳೋರಿಲ್ಲ ಅಷ್ಟೇ ವ್ಯತ್ಯಾಸ’.

ತೆಪರೇಸಿ ವಾದಕ್ಕೆ ಇನ್‌ಸ್ಪೆಕ್ಟರ್‌ಗೆ ಮಾತೇ ಹೊರಡಲಿಲ್ಲ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು