ಸಂಪಾದಕೀಯ: ಸಾಂಸ್ಕೃತಿಕ ನಾಯಕನಾಗಿ ಬಸವೇಶ್ವರ; ಘೋಷಣೆಯ ಆಶಯ ಕೃತಿರೂಪಕ್ಕೂ ಬರಲಿ

ಹನ್ನೆರಡನೇ ಶತಮಾನದ ಬಸವೇಶ್ವರರನ್ನು ‘ಕರ್ನಾಟಕದ ಸಾಂಸ್ಕೃತಿಕ ನಾಯಕ’ ಎಂದು ರಾಜ್ಯ ಸರ್ಕಾರ ಘೋಷಿಸಿರುವುದು, ಭಾರತದ ಇತಿಹಾಸದಲ್ಲಿ ಅನ್ಯಾದೃಶವಾದ ವಚನ ಪರಂಪರೆಯ ಶ್ರೇಷ್ಠ ಪ್ರತಿನಿಧಿಗೆ ನೀಡಿರುವ ಅಪೂರ್ವ ಗೌರವ. ಬಸವಣ್ಣನವರನ್ನು ‘ಕರ್ನಾಟಕದ ಸಾಂಸ್ಕೃತಿಕ ನಾಯಕ’ ಎಂದು ಘೋಷಿಸುವಂತೆ ನಾಡಿನ ವಿವಿಧ ಮಠಾಧೀಶರು ಹಾಗೂ ಚಿಂತಕರು ಮಾಡಿದ್ದ ಒತ್ತಾಯಗಳಿಗೆ ಸ್ಪಂದಿಸಿ ಸರ್ಕಾರ ಈ ತೀರ್ಮಾನ ಕೈಗೊಂಡಿದೆ. ಬಸವಣ್ಣನವರ ನೇತೃತ್ವದಲ್ಲಿ ನಡೆದ ಜಾತಿಭೇದ ಹಾಗೂ ಲಿಂಗ
ಭೇದಗಳಿಲ್ಲದ ಸಮಾಜವನ್ನು ರೂ‍ಪಿಸುವ ಕೆಲಸ ಹನ್ನೆರಡನೇ ಶತಮಾನಕ್ಕೆ ಮಾತ್ರವಲ್ಲದೆ ಇಂದಿಗೂ ಪ್ರಸ್ತುತ.

ಭಾರತದ ಸಂವಿಧಾನ ಪ್ರತಿಪಾದಿಸುವ ಆಶಯಗಳು ‘ಬಸವ ಪಥ’ದಲ್ಲೂ ಇದ್ದು, ಅವುಗಳ ಅನುಸರಣೆ ಇಂದಿನ ಬಹುತೇಕ ಸಾಮಾಜಿಕ ಸಮಸ್ಯೆಗಳಿಗೆ ಉತ್ತರವಾಗಿದೆ. ಕನ್ನಡದ ಮಣ್ಣಿಗೆ ಅಥವಾ ಒಂದು ವರ್ಗಕ್ಕೆ ಸೀಮಿತವಾದ ವ್ಯಕ್ತಿತ್ವ ಬಸವೇಶ್ವರರದಲ್ಲ. ಕನ್ನಡದ ಮಣ್ಣಿನಿಂದ ರೂಪುಗೊಂಡು ತನ್ನ ನಡೆ–ನುಡಿಯಿಂದ ವಿಶ್ವಕ್ಕೇ ಮಾದರಿಯಾದ ಚೇತನವನ್ನು ನಾಡಿನ ಸಾಂಸ್ಕೃತಿಕ ವ್ಯಕ್ತಿಯನ್ನಾಗಿ ಘೋಷಿಸಿರುವುದು ನಾಡಿನ ಸಾಕ್ಷಿಪ್ರಜ್ಞೆಯ ರೂಪಕವಾಗಿಸುವ ನಿಟ್ಟಿನಿಂದಲೂ ಮಹತ್ವದ ನಡೆಯಾಗಿದೆ. ಲೋಕಸಭಾ ಚುನಾವಣೆ ಸನ್ನಿಹಿತವಾಗುತ್ತಿರುವ ಸಂದರ್ಭದಲ್ಲಿ ಸಮುದಾಯ ಓಲೈಕೆಯ ರೂಪದಲ್ಲಿಯೂ ಬಸವಣ್ಣನವರಿಗೆ ಸಂದಿರುವ ಗೌರವವನ್ನು ನೋಡಲಿಕ್ಕೆ ಸಾಧ್ಯವಿದೆ. ಘೋಷಣೆಯ ಹಿಂದಿನ ಉದ್ದೇಶ ಯಾವುದೇ ಇದ್ದರೂ, ಪರಿಣಾಮದ ದೃಷ್ಟಿಯಿಂದ ಅದು ಮಹತ್ವದ್ದಾಗಿದೆ. ಬಸವಣ್ಣನವರ ಹೆಸರನ್ನು ವ್ಯಕ್ತಿಸೂಚಕವಾಗಿ ಅಥವಾ ಜಾತಿಸೂಚಕವಾಗಿ ನೋಡದೆ, ಕನ್ನಡ ಸಂಸ್ಕೃತಿ ಪ್ರತಿಪಾದಿಸಿದ ಮೌಲ್ಯಗಳ ರೂಪಕವಾಗಿ ನೋಡುವುದರಿಂದ ನಾಡಿಗೆ ಹೆಚ್ಚಿನ ಅನುಕೂಲವಿದೆ. ‘ಅನ್ನಭಾಗ್ಯ’ ಸೇರಿದಂತೆ ಐದು ಗ್ಯಾರಂಟಿಗಳ ಮೂಲಕ ಸರ್ವೋದಯದ ಪರಿಕಲ್ಪನೆಯನ್ನು ಕಾರ್ಯರೂಪಕ್ಕೆ ತರಲು ಹೊರಟಿರುವ ರಾಜ್ಯ ಸರ್ಕಾರದ ಪ್ರಯತ್ನಕ್ಕೆ ಬಸವಣ್ಣನವರ ದಾಸೋಹದ ಪರಿಕಲ್ಪನೆ ಪೂರಕವಾಗಿದೆ. ಬಸವಣ್ಣನವರ ಕರ್ತೃತ್ವ
ಶಕ್ತಿಯಿಂದ ರೂಪುಗೊಂಡ ವಚನಕಾರರ ‘ಅನುಭವ ಮಂಟಪ’ ಇಂದಿನ ಪ್ರಜಾಪ್ರಭುತ್ವದ ಅಡಿಗಲ್ಲೇ ಆಗಿದೆ. ನಾಡಿನ ಸಾಂಸ್ಕೃತಿಕ–ಸಾಹಿತ್ಯಕ ಪರಂಪರೆ ವಿಶ್ವಕ್ಕೆ ಕೊಡುಗೆ ನೀಡಿರುವ ‘ವಿಶ್ವಮಾನವ ಪರಂಪರೆ’ಯ ಬಹು ಮುಖ್ಯವಾದ ಕೊಂಡಿ ಎನ್ನುವ ಕಾರಣದಿಂದಾಗಿಯೂ ಕರ್ನಾಟಕದ ಸಾಂಸ್ಕೃತಿಕ ನಾಯಕನ ರೂಪದಲ್ಲಿ ಬಸವೇಶ್ವರರನ್ನು ಗುರುತಿಸಿರುವ ಕ್ರಮ ಸರಿಯಾದುದಾಗಿದೆ. ಬಸವಣ್ಣ
ನವರಿಗೆ ಸಂದಿರುವ ಈ ಗೌರವವನ್ನು ಕವಿರಾಜಮಾರ್ಗಕಾರ, ಪಂಪ, ಕುಮಾರವ್ಯಾಸ, ಕುವೆಂಪು, ರಾಜ್‌ಕುಮಾರ್‌ ಅವರಂತಹ ಸಾಧಕರ ಸಾಂಸ್ಕೃತಿಕ ಪರಂಪರೆಗೆ ಸಂದಿರುವ ಮನ್ನಣೆಯೆಂದು ಭಾವಿಸಬೇಕಾಗಿದೆ.