ಉಗ್ರರ ನೆಲೆಯತ್ತ ಮಿರೇಜ್–2000 ದಾಳಿ; ಅಪಾರ ಸಾವು– ನೋವು
ನವದೆಹಲಿ, ಮೇ 31 (ಪಿಟಿಐ)– ಕಾಶ್ಮೀರದ ಕಾರ್ಗಿಲ್ ವಲಯದಲ್ಲಿ ಪಾಕಿಸ್ತಾನ ಬೆಂಬಲಿತ ಅತಿಕ್ರಮಣಕಾರರು ವಶಪಡಿಸಿಕೊಂಡಿರುವ ಪ್ರದೇಶಗಳ ಮೇಲೆ ಅತ್ಯಂತ ಹೆಚ್ಚಿನ ಸಾಮರ್ಥ್ಯದ ಮಿರೇಜ್–2000 ಸೇರಿದಂತೆ ಭಾರತೀಯ ವಾಯುಪಡೆಯ ಯುದ್ಧ ವಿಮಾನಗಳು ಆರನೇ ದಿನವಾದ ಇಂದು ದಾಳಿ ನಡೆಸಿ ಅಪಾರ ಸಾವು–ನೋವು ಉಂಟು ಮಾಡಿದವು.
ಅತಿಕ್ರಮಣಕಾರರು ಎಲೆಕ್ಟ್ರಾನಿಕ್ ಸಮರಾಸ್ತ್ರ ಮತ್ತು ಅತ್ಯಾಧುನಿಕ ಶಸ್ತ್ರಾಸ್ತ್ರ ಗಳನ್ನು ಹೊಂದಿರುವುದರಿಂದ ಮಿಗ್ ವಿಮಾನಗಳಿಗಿಂತ ರಾತ್ರಿ ಕಾರ್ಯಾಚರಣೆಯಲ್ಲಿ ಅನುಕೂಲವಾಗುವ ಫ್ರೆಂಚ್ ನಿರ್ಮಿತ ಮಿರೇಜ್–2000 ವಿಮಾನ ಬಳಸಲು ನಿರ್ಧರಿಸಲಾಯಿತು. ವಿಮಾನ ದಾಳಿ ರಾತ್ರಿಯಿಡೀ ಮುಂದುವರಿಯುತ್ತದೆ.
ಭಾರತೀಯ ಸೇನೆ ನಡೆಸಿದ ದಾಳಿಗೆ ಸತ್ತ ಉಗ್ರಗಾಮಿಗಳ ಸಂಖ್ಯೆ 400 ಆಗಿದೆ. ಭಾರತದ ಕಡೆಯಿಂದ ಸತ್ತವರ ಸಂಖ್ಯೆ ನಿನ್ನೆವರೆಗೆ 33 ಆಗಿದ್ದು, 130 ಮಂದಿ ಗಾಯಗೊಂಡಿದ್ದಾರೆ.