ಪ್ರಜಾವಾಣಿಯಲ್ಲಿ 50 ವರ್ಷಗಳ ಹಿಂದೆ: ಶನಿವಾರ, 8–7–1972

ಬೆಂಗಳೂರು, ಜುಲೈ 7 – ಶರಾವತಿ ಪ್ರಕರಣದಲ್ಲಿ ತಮ್ಮನ್ನು ತಪ್ಪಿತಸ್ಥರೆಂದು ಆಪಾದಿಸಿ ನ್ಯಾಯಾಂಗ ತನಿಖೆಗೆ ಆಗ್ರಹಪಡಿಸುತ್ತಿರುವವರಿಗೆ ವಿಧಾನಸಭೆಯಲ್ಲಿ ಇಂದು ಬಿರುಸಾಗಿ ವಾಪಸು ಕೊಟ್ಟ ಲೋಕೋಪಯೋಗಿ ಇಲಾಖೆ ಮಂತ್ರಿ ಶ್ರಿ ಎಚ್‌.ಎಂ. ಚನ್ನಬಸಪ್ಪ ಅವರು , ‘ಸತ್ಯ ಹೊರತರುವುದಕ್ಕೆ ಸಕಾಲದಲ್ಲಿ ಸೂಕ್ತ ಕ್ರಮ ಕೈಗೊಳ್ಳುವುದೇ ಸರ್‍ಕಾರದ ನಿಲುವಾಗಿದೆ’ ಎಂದು ಸ್ಪಷ್ಟಪಡಿಸಿದರು.

ತನಿಖೆಗೆ ಆಗ್ರಹವೆಬ್ಬಿಸಿರುವ ಸಂಸ್ಥಾ ಕಾಂಗ್ರೆಸ್ಸಿಗರನ್ನು ಪ್ರತ್ಯೇಕವಾಗಿ ಒಂದು ಘಟ್ಟದಲ್ಲಿ ಬೊಟ್ಟು ಮಾಡಿ ‘ಲೋಕದಲ್ಲಿ ಜನ ನಿಮ್ಮನ್ನು ನಂಬುತ್ತಾರಾ?’ ಎಂದು ಕೇಳಿದ ಶ್ರಿ ಎಚ್‌.ಎಂ.ಸಿ. ಅವರು, ‘1962 ಮತ್ತು 67ರಲ್ಲಿ ನಾನೇ ನನ್ನ ‍ವಿರುದ್ಧವೇ ವಿಚಾರಣೆ ಏರ್‍ಪಡಿಸಿ ಅಂದೆ, ಆಗ ನೀವು ಯಾಕೆ ಮಾಡಲಿಲ್ಲ? ನೀವೇ ಅಧಿಕಾರದಲ್ಲಿದ್ದಿರಿ’ ಎಂದು ಕಾಂಗ್ರೆಸ್‌ ಸದಸ್ಯರ ಕರತಾಡನಗಳ ಮಧ್ಯೆ ಹೇಳಿದರು.