ಮಂಗಳೂರಿನ ಕಾಲೇಜೊಂದರ ವಿದ್ಯಾರ್ಥಿನಿಯರು, ರಸ್ತೆಯಲ್ಲೇ ಡ್ಯಾನ್ಸ್ ಮಾಡಿ ಕೆಲವು ಗಂಟೆಗಳ ಕಾಲ ಸಂಚಾರ ಅಸ್ತವ್ಯಸ್ತಗೊಳಿಸಿರುವುದು ಮಾಧ್ಯಮಗಳಲ್ಲಿ ವರದಿಯಾಗಿದೆ.
ಇದೊಂದು ಕೆಟ್ಟ ಬೆಳವಣಿಗೆ. ತಮ್ಮ ಕಾಲೇಜುಗಳಲ್ಲೇ ಡ್ಯಾನ್ಸ್ ಪ್ರದರ್ಶಿಸಲು ವಿದ್ಯಾರ್ಥಿಗಳಿಗೆ ಅವಕಾಶವಿದೆ. ಅದು ಸಾಲ
ದೆಂದರೆ ಬಯಲಿನಲ್ಲಿ ಡ್ಯಾನ್ಸ್ ಮಾಡಲಿ. ಅದನ್ನು ಬಿಟ್ಟು ಹತ್ತಾರು ಮಂದಿಯ ಸಂತೋಷಕ್ಕಾಗಿ ನೂರಾರು ವಾಹನಗಳ ಓಡಾಟಕ್ಕೆ ಅಡ್ಡಿಪಡಿಸಿ, ಸಾವಿರಾರು ಜನರಿಗೆ ತೊಂದರೆ ಕೊಡಬೇಕಿತ್ತೇ?
ಇತ್ತೀಚೆಗೆ ಮೈಸೂರಿನ ದೇವರಾಜ ಅರಸು ರಸ್ತೆಯಲ್ಲಿ ‘ರಸ್ತೆ ಹಬ್ಬ’ ನಡೆಸಿದ್ದರಿಂದ ಅಕ್ಕಪಕ್ಕದ ರಸ್ತೆಗಳಲ್ಲಿ ಟ್ರಾಫಿಕ್ ಜಾಮ್ ಉಂಟಾಗಿ ಸಾವಿರಾರು ಮಂದಿ ನಾಗರಿಕರು ಕಿರಿಕಿರಿ ಅನುಭವಿಸಿದ್ದುಂಟು.
ಮಂಗಳೂರಿನ ಕಾಲೇಜು ವಿದ್ಯಾರ್ಥಿನಿಯರ ‘ರಸ್ತೆ ಡ್ಯಾನ್ಸ್’ಗೆ ಮೈಸೂರಿನಲ್ಲಿ ನಡೆದ‘ರಸ್ತೆ ಹಬ್ಬ’ ಸ್ಫೂರ್ತಿ ಆಗಿರಬಹುದು(?).
ಸಂಚಾರಕ್ಕೆ ತೊಂದರೆ ಉಂಟುಮಾಡುವ ರಸ್ತೆ ಹಬ್ಬ, ರಸ್ತೆ ಡ್ಯಾನ್ಸ್ ಸಂಸ್ಕೃತಿಗೆ ಕಡಿವಾಣ ಹಾಕುವುದು ಸೂಕ್ತ. ಇಲ್ಲವಾದರೆ ಈ ಸಂಸ್ಕೃತಿ ಇತರ ಪಟ್ಟಣ, ನಗರಗಳಿಗೆ ಹಬ್ಬಬಹುದು!
