ಕರ್ನಾಟಕ ಪಬ್ಲಿಕ್ ಸ್ಕೂಲ್‍ಗಳಲ್ಲಿ ಕೆಲವರ ವಿರೋಧದ ನಡುವೆಯೂ ಎಲ್‍ಕೆಜಿ, ಯುಕೆಜಿ ಆರಂಭಿಸಲು ಸಿದ್ಧತೆಗಳಾಗುತ್ತಿವೆ. ಬದಲಾದ ಕಾಲಘಟ್ಟದಲ್ಲಿ, ಬದಲಾಗುತ್ತಿರುವ ಪೋಷಕರ ಮನಃಸ್ಥಿತಿಯಲ್ಲಿ ಇಂತಹ ನಡೆ ಸರ್ಕಾರಕ್ಕೂ ಅನಿವಾರ್ಯ. ಆದರೆ ಅನುದಾನಿತ ಶಾಲೆಗಳಿಗೆ ಮಾತ್ರ ಇಂತಹ ಕೃಪೆಯಿಲ್ಲ. ಕನ್ನಡ ಮಾಧ್ಯಮ ಶಾಲೆಗಳು ಇಂಗ್ಲಿಷ್ ವಿಭಾಗ ತೆರೆಯುವಂತಿಲ್ಲ. ಈ ಕಠಿಣ ನಿಯಮವೇ ಹಲವಾರು ಅನುದಾನಿತ ಶಾಲೆಗಳಿಗೆ ಮುಳುವಾಗಿರುವುದು. ಕನ್ನಡದ ಜೊತೆಗೆ ಇಂಗ್ಲಿಷ್ ಮಾಧ್ಯಮ ವಿಭಾಗವನ್ನೂ ತೆರೆದಾಗ ಮಾತ್ರ ವಿದ್ಯಾರ್ಥಿಗಳ ಕನಿಷ್ಠ ಸಂಖ್ಯೆಯನ್ನು ಕಾಯ್ದುಕೊಳ್ಳಲು ಸಾಧ್ಯ. ನಿಯಮಗಳನ್ನು ಮಾನವೀಯಗೊಳಿಸಿ ಹೆಚ್ಚುವರಿ ಶಿಕ್ಷಕರ ಹುದ್ದೆಗಳಿಗಾಗಲೀ, ಕೊಠಡಿಗಳಿಗಾಗಲೀ ಅನುದಾನ ನೀಡದೆ, ಇಂಗ್ಲಿಷ್ ಮಾಧ್ಯಮ ವಿಭಾಗ ತೆರೆಯಲು ಷರತ್ತುಬದ್ಧವಾಗಿ ಅನುಮತಿಸಿದರೆ ಸರ್ಕಾರಕ್ಕೂ ಆರ್ಥಿಕವಾಗಿ ಹೊರೆಯಾಗದು, ಜೊತೆಗೆ ಗುಣಮಟ್ಟದ ಗ್ರಾಮೀಣ ಶಾಲೆಗಳನ್ನು ಬದುಕಿಸಿದಂತೆಯೂ ಆಗುತ್ತದೆ.
-ಡಾ. ಮುರಳೀಧರ ಕಿರಣಕೆರೆ, ತೀರ್ಥಹಳ್ಳಿ
