ಪ್ರಜಾಪ್ರಭುತ್ವ ರಾಷ್ಟ್ರಗಳಲ್ಲಿ ನಾವು ಈ ವ್ಯಸನವನ್ನು ಸೂಕ್ತ ರೀತಿಯಲ್ಲಿ ನಿಯಂತ್ರಿಸಲು ಶಾಲಾ ಕಾಲೇಜು ಪಠ್ಯಗಳ ಹಂತದಿಂದಲೇ ಪ್ರಯತ್ನ ನಡೆಸಬೇಕು.ಸಂಪೂರ್ಣ ಪಾನ ನಿಷೇಧದಂತಹ ಅತಿರೇಕದ, ಅಗ್ಗದ ಜನಪ್ರಿಯತೆಯ ಕ್ರಮದಿಂದ ಅನಾರೋಗ್ಯಕರ ಪೇಯಗಳು, ಕಳ್ಳಬಟ್ಟಿ ದಂಧೆ, ಸಾಮಾಜಿಕ ಹಾಗೂ ಆರ್ಥಿಕ ಏರುಪೇರು, ನೂತನ ಮೇಲು, ಕೀಳು ವರ್ಗ ನಿರ್ಮಾಣ, ತನ್ಮೂಲಕ ಭ್ರಷ್ಟಾಚಾರ ಹೆಚ್ಚಳದಂತಹ ಅನಪೇಕ್ಷಿತ ಪೆಡಂಭೂತಗಳು ಸೃಷ್ಟಿಯಾಗುತ್ತವೆ. ಹೀಗಾಗಿ, ಮದ್ಯವು ಹಲವರಿಗೆ ಹೃದ್ಯ ಆಗುವುದೇಕೆ ಎಂಬ ಬಗ್ಗೆ ಮೊದಲು ಸೂಕ್ತ ಅಧ್ಯಯನ ನಡೆಸಿ, ಅದಕ್ಕೆ ಕಾರಣವಾಗುವ ಅಂಶಗಳನ್ನು ನಿಯಂತ್ರಿಸುವುದು ಹೇಗೆ ಎಂಬ ಬಗ್ಗೆ ಯೋಚಿಸಬೇಕಾಗಿದೆ.