ಉದ್ದೇಶಿತ ಈ ಬಹುಮಹಡಿ ಕಟ್ಟಡಗಳಲ್ಲಿ ಹಲವಾರು ಕಚೇರಿಗಳು ಬರುವುದರಿಂದ, ಇವುಗಳ ಸಿಬ್ಬಂದಿ, ಕಚೇರಿಗೆ ಬಂದುಹೋಗುವ ಜನ, ಕಾವಲು ಸಿಬ್ಬಂದಿ, ಕ್ಯಾಂಟೀನ್ ನಡೆಸುವವರು, ಸಾಮಾನು ಸರಂಜಾಮು ತಲುಪಿಸುವವರು, ಇವರೆಲ್ಲ ಬಂದು ಹೋಗುವ ವಾಹನಗಳ ಸಾಂದ್ರತೆ ಎಲ್ಲವೂ ಸೇರಿದರೆ ನಗರದ ಈ ಕೇಂದ್ರ ಭಾಗ ಏನಾಗುತ್ತದೆ ಎಂಬುದನ್ನು ಊಹಿಸುವುದು ಅಸಾಧ್ಯ. ಸರ್ಕಾರ ಈ ವಿಷಯದಲ್ಲಿ ಆತುರ ಮಾಡದೆ, ಸಂಬಂಧಪಟ್ಟ ಇಲಾಖೆಗಳಿಂದ ಸೂಕ್ತ ಸಲಹೆ ಪಡೆದು ಮುಂದಡಿ ಇಡಬೇಕು. ಈ ಬಹುಮಹಡಿ ಕಟ್ಟಡಗಳಲ್ಲಿ ಅಡಕ ಮಾಡಬೇಕೆಂದಿರುವ ಕಚೇರಿಗಳನ್ನು ಹಾಗೂ ಈಗಾಗಲೇ ನಗರದ ಕೇಂದ್ರ ಭಾಗದಲ್ಲಿರುವ ಇನ್ನು ಕೆಲವು ಕಚೇರಿಗಳನ್ನು ವಿಕೇಂದ್ರೀಕರಣಗೊಳಿಸಿ, ನಗರದ ಎಂಟು ದಿಕ್ಕುಗಳಲ್ಲಿ ಇರುವಂತೆ ಮಾಡಿದರೆ, ಕೇಂದ್ರ ಭಾಗವು ವಾಯುಮಾಲಿನ್ಯ ಮತ್ತು ಸಂಚಾರ ದಟ್ಟಣೆಯಿಂದ ಮುಕ್ತವಾಗುತ್ತದೆ.
