ಭಾರತದ ಎಷ್ಟು ಕುಟುಂಬಗಳಿಗೆ ಒಳ್ಳೆಯ ಆಹಾರ, ಆರೋಗ್ಯ, ಶಿಕ್ಷಣ, ನೀರು, ಮೂಲ ಸೌಕರ್ಯಗಳ ಜೊತೆಗೆ ಮಾಸ್ಕ್ ವೆಚ್ಚವನ್ನೂ ಹೊಂದಿಸಲು ಸಾಧ್ಯವಿದೆ? ಕನಿಷ್ಠ ಶೇಕಡ 30ರಷ್ಟು ಕುಟುಂಬಗಳು ಕಡುಬಡತನದ ಸ್ಥಿತಿಯಲ್ಲಿ ಇವೆ. ಅವರ ಕೈಯಲ್ಲಿ ಖಂಡಿತ ಈ ವೆಚ್ಚ ಭರಿಸಲಾಗದು. ಆ ಕಾರಣಕ್ಕೆ ರಸ್ತೆಯಲ್ಲಿ ಮುಖಕ್ಕೆ ತುಂಡು ಬಟ್ಟೆ ಮುಚ್ಚಿಕೊಂಡು ಓಡಾಡುವವರ ಸಂಖ್ಯೆ ಹೆಚ್ಚಾಗಿ ಕಾಣುತ್ತದೆ. ಸೊಪ್ಪು, ತರಕಾರಿ ಮಾರುವವರು, ದಿನಗೂಲಿ ನೌಕರರು, ಹಾಲು, ಪೇಪರ್ ಹಾಕುವವರು, ಪೌರಕಾರ್ಮಿಕರು ಮುಂತಾದವರು ಮಾಸ್ಕ್ ಧರಿಸಿಲ್ಲ ಎಂಬ ಕಾರಣಕ್ಕೆ ಹೀನಾಯವಾಗಿ ಕಾಣುವುದನ್ನು, ಸಭ್ಯತೆಯ, ನಾಗರಿಕತೆಯ ಪಾಠ ಮಾಡುವುದನ್ನು ನಾವು ಬಿಡಬೇಕಿದೆ. ಈ ವರ್ಗಗಳಿಗೆ ಉಚಿತ ಮಾಸ್ಕ್ ಒದಗಿಸುವಂತೆ ಸರ್ಕಾರವನ್ನು ಒತ್ತಾಯಿಸಬೇಕಿದೆ.