ವ್ಯಕ್ತಿಯು ತನ್ನ ಕೆಲಸಗಳಿಗೆ ಅಡಚಣೆಯುಂಟಾದಾಗ ಇಲ್ಲವೇ ತನ್ನ ಮನದ ಆಸೆ ಆಕಾಂಕ್ಷೆಗಳು ಈಡೇರದಿದ್ದಾಗ ಹತಾಶನಾಗಿ, ಅದಕ್ಕೆ ಕಾರಣರಾದ ವ್ಯಕ್ತಿಗಳನ್ನು ಬೈಯ್ಯುವುದು ಒಂದು ಬಗೆಯಾದರೆ, ಇತರರ ಮೆಚ್ಚುಗೆಯನ್ನು ಗಳಿಸಿ, ಅವರಿಂದ ಲಾಭ ಪಡೆಯುವುದಕ್ಕಾಗಿ ಬೈಯ್ಯುವುದು ಮತ್ತೊಂದು ಬಗೆಯಾಗಿದೆ. ಇಂದು ರಾಜಕೀಯ ಅಧಿಕಾರ ಪಡೆಯುವುದಕ್ಕಾಗಿ ಅಥವಾ ಪಡೆದಿರುವುದನ್ನು ಉಳಿಸಿಕೊಳ್ಳುವುದಕ್ಕಾಗಿ ಮತ್ತೊಬ್ಬರ ವ್ಯಕ್ತಿತ್ವವನ್ನು ಅಲ್ಲಗಳೆದು ಮಾತನಾಡಿ ಪಕ್ಷದಲ್ಲಿನ ಮುಖಂಡರ ಕೃಪೆಗೆ ಪಾತ್ರರಾಗಲು ಬೈಗುಳವು ಒಂದು ಸಾಧನವಾಗಿದೆ. ರಾಜಕಾರಣಿಗಳ ಬೈದಾಡುವಿಕೆಯಿಂದ ನೋಡುವವರಿಗೆ ಮನರಂಜನೆ ದೊರೆಯುತ್ತದೆಯೇ ಹೊರತು, ಹಸಿವಿನಿಂದ, ಬಡತನದಿಂದ, ಜಾತಿ ಮತ್ತು ಧರ್ಮದ ಕಾರಣಕ್ಕಾಗಿ ಹಿಂಸೆಗೆ ಗುರಿಯಾಗಿ ಸಾವು ನೋವಿಗೆ ನಿತ್ಯವೂ ಬಲಿಯಾಗುತ್ತಿರುವ ಜನರ ಬದುಕಿಗೆ ಯಾವೊಂದು ಪರಿಹಾರವೂ ದೊರೆಯುವುದಿಲ್ಲ.
