ಇಂಗ್ಲಿಷ್‌ ಮಾಧ್ಯಮ: ದ್ವಂದ್ವ ನೀತಿ ಸರಿಯೇ?

ಸೋಮವಾರ, ಜೂನ್ 17, 2019
31 °C

ಇಂಗ್ಲಿಷ್‌ ಮಾಧ್ಯಮ: ದ್ವಂದ್ವ ನೀತಿ ಸರಿಯೇ?

Published:
Updated:

‘ಸರ್ಕಾರಿ ಶಾಲೆಗಳಲ್ಲಿ ಇಂಗ್ಲಿಷ್ ಮಾಧ್ಯಮ: ಕೊನೆಗೂ ಹೊರಬಿದ್ದ ಆದೇಶ’ (ಪ್ರ.ವಾ., ಮೇ 19) ಸುದ್ದಿ ಅನಿರೀಕ್ಷಿತವೇನಲ್ಲ. ಸರ್ಕಾರದ ಈ ಅವೈಜ್ಞಾನಿಕ ಕ್ರಮಕ್ಕೆ ಪ್ರತಿಭಟಿಸುತ್ತಿರುವ ಅನೇಕ ಪ್ರಜ್ಞಾವಂತರು ತಮ್ಮ ಪ್ರತಿಭಟನೆಯನ್ನು ಈಗಲೂ ಮುಂದುವರಿಸುವರೆಂಬುದು ನಮ್ಮ ನಂಬಿಕೆ. ಆದೇಶ ಹೊರಬಂದಾಕ್ಷಣ ಚರ್ಚೆ ಇತ್ಯರ್ಥವಾಗಿದೆ ಎಂದಾಗುವುದಿಲ್ಲ.

ಹೊಸ ಇಂಗ್ಲಿಷ್ ಮಾಧ್ಯಮ ತರಗತಿಗಳನ್ನು ಪ್ರಾರಂಭಿಸಲು ಸರ್ಕಾರ ಸಾರ್ವಜನಿಕರ ಹಣವನ್ನು ವ್ಯಯ ಮಾಡುತ್ತಿರುವುದರಿಂದ ನಾವು ಸರ್ಕಾರದಿಂದ ಕೆಲವು ಸ್ಪಷ್ಟನೆಗಳನ್ನು ನಿರೀಕ್ಷಿಸುತ್ತೇವೆ. 2009ರಲ್ಲಿ ಪಾಕಿಸ್ತಾನದ ಪಂಜಾಬ್ ಸರ್ಕಾರವು ಒಂದರಿಂದ ಹನ್ನೆರಡನೇ ತರಗತಿಗಳವರೆಗೆ ಮಾತೃಭಾಷೆಗೆ ಬದಲಾಗಿ ಇಂಗ್ಲಿಷ್‍ ಅನ್ನು ಕಲಿಕಾ ಮಾಧ್ಯಮವಾಗಿ ಅಳವಡಿಸಿಕೊಂಡಿತು. 2014ರಲ್ಲಿ ಬ್ರಿಟಿಷ್ ಕೌನ್ಸಿಲ್ ಸಂಸ್ಥೆಯು ಇದರ ಪರಿಣಾಮವನ್ನು ಅಧ್ಯಯನ ಮಾಡಿ, ಹೀಗೆ ಪಲ್ಲಟಗೊಂಡಿದ್ದರಿಂದ ಉಂಟಾದ ಶೈಕ್ಷಣಿಕ ದುಷ್ಪರಿಣಾಮಗಳನ್ನು ಅಂಕಿಅಂಶಗಳೊಂದಿಗೆ ವರದಿ ಮಾಡಿ, ಇದೊಂದು ನಿರರ್ಥಕ ಪ್ರಯೋಗ ಎಂದು ತಿಳಿಸಿದೆ.

ಕರ್ನಾಟಕದ ಪರಿಸ್ಥಿತಿಯೂ ಬೇರೆಯೇನಲ್ಲ. ಎಂದ ಮೇಲೆ ಸರ್ಕಾರದ ಈ ಪ್ರಯೋಗದ ಔಚಿತ್ಯವೇನು? ಪೂರ್ವಭಾವಿಯಾಗಿ ಯಾವ ಕ್ಷೇತ್ರಾಧ್ಯಯನವನ್ನೂ ಮಾಡದೆ, ಕೆಲವು ಅಧ್ಯಾಪಕರಿಗೆ ವಿಶೇಷ ತರಬೇತಿ ನೀಡಿರುವುದಾಗಿ ಹೇಳುತ್ತ ಸಾರ್ವಜನಿಕರ ಹಣವನ್ನು ವ್ಯಯ ಮಾಡುವುದು ಅನುಚಿತವಲ್ಲವೇ? ‘ದಕ್ಷಿಣ ಭಾರತೀಯ ಇಂಗ್ಲಿಷ್ ಪ್ರಾದೇಶಿಕ ಸಂಸ್ಥೆ’ ಮಾತೃಭಾಷಾ ಮಾಧ್ಯಮವನ್ನೇ ಶಿಫಾರಸು ಮಾಡಿರುವುದನ್ನು ಏಕೆ ಗಣನೆಗೆ ತೆಗೆದುಕೊಳ್ಳುತ್ತಿಲ್ಲ? ನಮ್ಮ ಅಕಾಡೆಮಿಗಳೂ ಪ್ರಾದೇಶಿಕ ಭಾಷೆಗಳಲ್ಲೇ ಶಿಕ್ಷಣ ನೀಡಬೇಕೆಂದು ಹೇಳುತ್ತಿವೆ. ಇದೂ ಸಾಲದಾದರೆ ಬ್ರಿಟಿಷ್ ಕೌನ್ಸಿಲ್‍ನಂತಹ ಸಂಸ್ಥೆಯಿಂದ ಅಧ್ಯಯನ ಮಾಡಿಸಿ ಸೂಕ್ತ ನಿರ್ಧಾರ ತೆಗೆದುಕೊಳ್ಳಬೇಕು. ಹಲವು ವರ್ಷಗಳಿಂದ ಸರ್ಕಾರವು ಖಾಸಗಿ ಶಾಲೆಗಳ ಮಾಧ್ಯಮ ನೀತಿಯ ವಿರುದ್ಧ ನ್ಯಾಯಾಲಯಗಳಲ್ಲಿ ವಾದ ಮಂಡಿಸುತ್ತಾ ಬಂದಿದೆ. ಈವರೆಗೆ ವಿರೋಧಿಸಿದ ನೀತಿಯನ್ನೇ ಈಗ ತಾನೂ ಅಳವಡಿಸಿಕೊಳ್ಳುವುದಾದರೆ ಈ ಪಲ್ಲಟವನ್ನು ಏನೆಂದು ಗ್ರಹಿಸಬೇಕು?

ಜಿ.ಎಸ್.ಜಯದೇವ, ಎಚ್.ಎನ್.ಮುರಳೀಧರ, ಚಾಮರಾಜನಗರ

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 2

    Angry

Comments:

0 comments

Write the first review for this !