ನಾಡಗೀತೆಯನ್ನು ಮೊಟಕುಗೊಳಿಸಿ ಎರಡೂವರೆ ನಿಮಿಷಕ್ಕೆ ಇಳಿಸುವ ಪ್ರಸ್ತಾವ ಇನ್ನೊಮ್ಮೆ ಮೇಲ್ಮೆಗೆ ಬಂದಿದೆ ಮತ್ತು ಇದನ್ನು ಆದ್ಯತೆಯ ಮೇಲೆ ಮಾಡುವ ಆತುರ ಕಾಣುತ್ತಿದೆ. ಮೂರು ನಿಮಿಷ ನಿಂತು ನಾಡಗೀತೆ ಹಾಡಲು ಕೆಲವರಿಗೆ ಅನನುಕೂಲವಾಗುತ್ತದೆ ಎನ್ನುವ ಸಮಜಾಯಿಷಿ ನೀಡಲಾಗುತ್ತಿದೆ. ಸರ್ಕಾರ ನೀಡುತ್ತಿರುವ ಈ ಕಾರಣವನ್ನು ಕೇಳಿ, ಮೂರು ನಿಮಿಷಕಾಲ ನಿಂತು ನಾಡಗೀತೆ ಹಾಡಲಾಗದವರು ಕನ್ನಡ ನಾಡು- ನುಡಿಯನ್ನು ಹೇಗೆ ಉಳಿಸಬಹುದು ಮತ್ತು ಬೆಳೆಸಬಹುದು ಎಂದು ಪ್ರಜ್ಞಾವಂತ ಕನ್ನಡಿಗರು ಪ್ರಶ್ನಿಸುತ್ತಿದ್ದಾರೆ. ನಾಡಗೀತೆಯನ್ನು ದಿನಾಲೂ ಹಾಡುವುದಿಲ್ಲ. ವರ್ಷದಲ್ಲಿ ಒಂದೆರಡು ಬಾರಿ ಈ ಅವಕಾಶ ಬರುತ್ತದೆ. ಮೂರು ನಿಮಿಷದ ಹಾಡು ಭಾರವಾಗುತ್ತಿರುವುದು ತೀರಾ ಆಶ್ಚರ್ಯ.
