ವಾಚಕರ ವಾಣಿ| ಕಾನೂನು ಗೌರವಿಸುವ ಮಾದರಿ ನಡೆ

ಬ್ರಿಟನ್ ಪ್ರಧಾನಿ ರಿಷಿ ಸುನಕ್ ಅವರು ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಸೀಟ್ ಬೆಲ್ಟ್ ತೆಗೆದ ಕಾರಣಕ್ಕೆ ಅಲ್ಲಿನ ಪೊಲೀಸರು ದಂಡ ವಿಧಿಸಿ ನೋಟಿಸ್ ಜಾರಿ ಮಾಡಿರುವುದು ವರದಿಯಾಗಿದೆ (ಪ್ರ. ವಾ., ಜ. 22). ಕಾನೂನನ್ನು ಎಲ್ಲರಿಗೂ ಅನ್ವಯಿಸಿ ನಿರ್ಭಯದಿಂದ ಕಾರ್ಯ ನಿರ್ವಹಿಸುವ ಸ್ವಾತಂತ್ರ್ಯ ಬ್ರಿಟನ್ ದೇಶದ ಪೊಲೀಸ್ ಅಧಿಕಾರಿಗಳಿಗೆ ಇರುವಂತೆ, ನಮ್ಮ ದೇಶದಲ್ಲಿ ಇಂತಹ ಕಠಿಣ ಕಾನೂನು ಗೌರವಿಸುವ ಪರಿಪಾಟ ಬರಲು ಇನ್ನೂ ಎಷ್ಟು ಶತಮಾನಗಳು ಬೇಕಾಗಬಹುದೋ? ಕಾನೂನುಗಳನ್ನು ಮುರಿಯುವುದೇ ಒಂದು ದೊಡ್ಡ ಸಾಹಸವೆಂಬಂತೆ ಅಥವಾ ದಂಡಕ್ಕೆ ಬದಲಾಗಿ ವಶೀಲಿಗೆ ಒಗ್ಗಿ ಹೋಗಿರುವ ನಮ್ಮ ದೇಶದಲ್ಲಿ ಕಾನೂನುಗಳು ನಾಮಕಾವಸ್ತೆ ಆಗಿ ಪರಿಣಮಿಸಿವೆ.

ಪ್ರಧಾನಿಯೊಬ್ಬರಿಗೆ ದಂಡ ವಿಧಿಸುವಂಥ ಕಾನೂನು ಕ್ರಮ ಜರುಗಿಸಿರುವ ಬ್ರಿಟನ್ ಪೊಲೀಸರ ಕಾರ್ಯ ಶ್ಲಾಘನೀಯ ಮತ್ತು ಅನುಕರಣೀಯ. 

- ಡಿ.ಪ್ರಸನ್ನಕುಮಾರ್, ಬೆಂಗಳೂರು