ವಾಚಕರವಾಣಿ: ರಂಗಮಂದಿರ ಕಾಯ್ದಿರಿಸಲು ತೊಡಕು ನಿವಾರಿಸಿ

ಕೋವಿಡ್ ನಿಯಂತ್ರಣಕ್ಕೆ ಬಂದ ನಂತರದಲ್ಲಿ ಬೆಂಗಳೂರಿನಲ್ಲಿ ಸಾಂಸ್ಕೃತಿಕ ಚಟುವಟಿಕೆಗಳು ಗರಿಗೆದರಿರುವುದು ಖಂಡಿತಾ ಸಂತಸದ ವಿಷಯ. ಆದರೆ ರಂಗ ತಂಡ ಮತ್ತು ಸಾಂಸ್ಕೃತಿಕ ತಂಡಗಳನ್ನು ಕಂಗೆಡಿಸಿರುವುದು ರಂಗಮಂದಿರಗಳ ಬಾಡಿಗೆ ಹೆಚ್ಚಳ ಆಗಿರುವುದು. ಕೊರೊನಾ ಹೊಡೆತದಿಂದ ಸಾವರಿಸಿಕೊಂಡು ಕಾರ್ಯಕ್ರಮ ನೀಡಲು ಮುಂದಾದ ತಂಡಗಳಿಗೆ, ಹೆಚ್ಚಳವಾಗಿರುವ ಬಾಡಿಗೆ ಮತ್ತು ಠೇವಣಿ ಬಿಸಿತುಪ್ಪವಾಗಿದೆ. ಈಗ ರಂಗಮಂದಿರಗಳನ್ನು ಕಾಯ್ದಿರಿಸಲು ಹೊಸ ವೆಬ್‌ಸೈಟ್ ಅಳವಡಿಸಲಾಗಿದೆ. ಅದರಲ್ಲಿ ಕೆಲವು ತೊಡಕುಗಳನ್ನು ಕಲಾತಂಡಗಳು ಎದುರಿಸುತ್ತಿವೆ. ಒಂದೇ ದಿನಾಂಕದ ಒಂದೇ ಅವಧಿಯು ಎರಡೆರಡು ತಂಡಗಳಿಗೆ ನಿಗದಿಯಾಗು ತ್ತಿದೆ. ಕಲಾಗ್ರಾಮ, ಕಲಾಕ್ಷೇತ್ರದ ಕಾಯ್ದಿರಿಸುವಿಕೆಯಲ್ಲಿ ಈ ತೊಂದರೆ ಆಗಿದೆ. ಇದನ್ನು ಇಲಾಖೆಯ ಗಮನಕ್ಕೂ ತರಲಾಗಿದೆ. ತಾಂತ್ರಿಕ ತಪ್ಪಿನಿಂದ ಹೀಗಾಗಿರಬಹುದು ಎನ್ನುತ್ತಾರೆ ಸಂಬಂಧಿಸಿದ ಅಧಿಕಾರಿಗಳು.