ಚಿನ್ನದ ರಥ, ಹಿಮ್ಮೊಗ ಪಥ
ಮಾನ್ಯ ಮುಖ್ಯಮಂತ್ರಿಯವರೆ,
ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ 240 ಕಿಲೊ ಚಿನ್ನದ ರಥವನ್ನು ಮಾಡಿಸುವ ಹಳೇ ಪ್ರಸ್ತಾವವನ್ನು ನೀವು ಮತ್ತೆ ಎತ್ತಿಕೊಂಡಿದ್ದೀರಿ. ‘ಸರ್ಕಾರದ ಕೆಲಸ ದೇವರ ಕೆಲಸ’ ಎಂಬುದನ್ನು ನೀವು ಹಿಂದುಮುಂದಾಗಿ ಅರ್ಥ ಮಾಡಿಕೊಂಡಿರುವಂತೆ ಕಾಣುತ್ತದೆ. ಅದಿರಲಿ, ಒಂದು ಗ್ರಾಮ್ ಚಿನ್ನವನ್ನು ಗಣಿಯಿಂದ ತೆಗೆಯಬೇಕೆಂದರೆ ಸುಮಾರು ಎರಡು ಟನ್ ಅದುರನ್ನು ಪುಡಿ ಮಾಡಿ, ಘಾಟು ಕೆಮಿಕಲ್ ಮೂಲಕ ಸ್ವಚ್ಛ ಮಾಡಿ, ನೀರಿಗೆ, ನೆಲಕ್ಕೆ, ಗಾಳಿಗೆ ವಿಷ ಹಬ್ಬಿಸಿ ಜೀವಜಾಲದ ಮಾರಣಹೋಮ ಮಾಡಬೇಕಾಗುತ್ತದೆ. 240 ಕಿಲೊ ಚಿನ್ನ ಅಂದರೆ ಭೂಮಿಯ ಎಲ್ಲೋ 50 ಲಕ್ಷ ಟನ್ ಬಂಡೆಯನ್ನು ಸ್ಫೋಟಿಸಿ ಅದೆಷ್ಟೊ ಸಾವಿರ ಟನ್ ಕೆಮಿಕಲ್ ತ್ಯಾಜ್ಯಗಳನ್ನು ಸೃಷ್ಟಿ ಮಾಡಬೇಕಾಗುತ್ತದೆ. ಅಷ್ಟೊಂದು ವಿಧ್ವಂಸಕ ದ್ರವ್ಯಗಳನ್ನು ಸೃಷ್ಟಿಸುವ ನಿಸರ್ಗವಿರೋಧಿ ಕೆಲಸವನ್ನು ಯಾವ ದೇವರು ಮೆಚ್ಚುತ್ತಾನೆ?
ರಾಜ್ಯದ ಎಷ್ಟೊಂದು ಕಡೆ ಕೆರೆಗಳು ಒಣಗಿವೆ, ನದಿಕೊಳ್ಳಗಳು ಮಾಲಿನ್ಯದ ಮಡುಗಳಾಗಿವೆ, ಜೀವಲೋಕ ಹೈರಾಣಾಗಿದೆ. ಕುಕ್ಕೆ ಸುಬ್ರಹ್ಮಣ್ಯದ ಬಳಿಯೇ ಕುಮಾರಧಾರಾದಲ್ಲಿ ಮೀನುಗಳು ವಿಷಪ್ರಾಶನದಿಂದ ಸತ್ತು ತೇಲುತ್ತಿವೆ. ಯಾಕೆ ಚಿನ್ನದ ರಥದ ಹುಚ್ಚು? ಅದೇನೋ ‘2005ರಲ್ಲೇ ಟೆಂಡರ್ ಕರೆದಿದ್ದು, ಈಗಿನದಲ್ಲ’ ಎಂದೆಲ್ಲ ನಿಮ್ಮ ಸಚಿವಾಲಯ ಹೇಳಿದೆ. ನೀವು ಹಿಂದಿನ ಬಾರಿ ಮುಖ್ಯಮಂತ್ರಿ
ಯಾಗಿದ್ದಾಗ ಕೈಗೊಂಡ ಇತರ ಎಷ್ಟೊಂದು ನಿರ್ಧಾರಗಳು ಜಾರಿಗೆ ಬಾರದೆ ನನೆಗುದಿಗೆ ಬಿದ್ದಿವೆ ಗಮನಿಸಿದ್ದೀರಾ? ನಿಮ್ಮದೇ ಸಹಿ ಇರುವ ‘ಮಾನವ ಅಭಿವೃದ್ಧಿ ಯೋಜನಾ ವರದಿ’ಯನ್ನು (2006) ಮತ್ತೊಮ್ಮೆ ತೆಗೆಸಿ ನೋಡಿ. ದುರ್ಬಲ ವರ್ಗಕ್ಕೆ ನೀರು, ಪೌಷ್ಟಿಕ ಆಹಾರ, ಶೌಚ ವ್ಯವಸ್ಥೆ, ಶಿಕ್ಷಣ, ಆಸ್ಪತ್ರೆ, ಉದ್ಯೋಗ ಎಲ್ಲವುಗಳ ಭರವಸೆ ನೀಡಿದ್ದಿರಿ. ಜನತಾ ಜನಾರ್ದನನಿಗೆ ಹೇಳಿಕೊಂಡ ಆ ಎಲ್ಲ ಹರಕೆಗಳನ್ನೂ ಒಪ್ಪಿಸಿದ್ದೀರಾ?
ನಾಗೇಶ ಹೆಗಡೆ, ವೈ. ಲಿಂಗರಾಜು, ಡಾ. ಎಂ. ವೆಂಕಟಸ್ವಾಮಿ (ಭೂವಿಜ್ಞಾನಿಗಳು), ಬೆಂಗಳೂರು
ಇರ್ತಾರಾ ಮೋದಿ? ಬರ್ತಾರಾ ರಾಹುಲ್?
ಲೋಕಸಭೆ ಫಲಿತಾಂಶಕ್ಕಾಗಿ ವಿಶ್ವವೇ ಬೆರಗುಗಣ್ಣಿನಿಂದ ಕಾಯುತ್ತಿದೆ. ನರೇಂದ್ರ ಮೋದಿ ಗೆಲ್ತಾರಾ? ರಾಹುಲ್ ಗಾಂಧಿ ಬರ್ತಾರಾ? ರಾಜಕಾರಣದ ಕ್ಷಣಕ್ಷಣದ ಮಾಹಿತಿ, ತಾಜಾ ಅಪ್‌ಡೇಟ್‌ಗಳಿಗಾಗಿ www.prajavani.net/prajamatha ನೋಡಿ.
ಫೇಸ್‌ಬುಕ್‌ನಲ್ಲಿ ನಮ್ಮನ್ನು ಲೈಕ್ ಮಾಡಿ ಅಥವಾ ಟ್ವಿಟರ್, ಯೂಟ್ಯೂಬ್, ಇನ್‌ಸ್ಟಾಗ್ರಾಂನಲ್ಲಿ ಫಾಲೊ ಮಾಡಿ.
ತ್ವರಿತ ಸುದ್ದಿ, ನಿಖರ ವಿಶ್ಲೇಷಣೆಗೆ www.prajavani.net ಓದಿ. 'ಪ್ರಜಾವಾಣಿ' ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.
ಬರಹ ಇಷ್ಟವಾಯಿತೆ?
11
1
0
0
0
0 comments
View All