ವಿಡಂಬನಕಾರ ವೀರ್ ದಾಸ್ ಅವರು ಅಮೆರಿಕದಲ್ಲಿ ನೀಡಿದ ಕಾರ್ಯಕ್ರಮದಲ್ಲಿ ‘ಎರಡು ಮುಖ ಹೊತ್ತ ಭಾರತ’ ಎಂದು ನಮ್ಮ (ತನ್ನ) ದೇಶವನ್ನು ಅಲ್ಲಿನ ಪ್ರೇಕ್ಷಕವರ್ಗದ ಮುಂದೆ ನಿಲ್ಲಿಸಿದ ರೀತಿ ಅತ್ಯಂತ ಹೇಯವಾಗಿದೆ. ಈತ ಸ್ಟ್ಯಾಂಡ್‌ಅಪ್ ಕಮಿಡಿಯನ್‌ ಎಂದು ಮಾಧ್ಯಮಗಳು ವಿವರಿಸಿವೆ. ಕಮಿಡಿಯನ್‌ ಎಂದರೆ ಜನರನ್ನು ನಗಿಸುವಾತ, ಹಾಸ್ಯನಟ, ಹಾಸ್ಯನಾಟಕಕಾರ. ಸ್ಟ್ಯಾಂಡ್‌ಅಪ್ ಎನ್ನುವ ವಿಶೇಷಣ ಪದದ ಅರ್ಥ ಪ್ರೇಕ್ಷಕವರ್ಗವನ್ನು ಹಾಸ್ಯದ ಮಾತುಗಳಿಂದ, ಸಂಗತಿಗಳಿಂದ ರಂಜಿಸುವಾತನೆಂದು. ಅಮೆರಿಕದ ಜನರ ಮುಂದೆ ತಾವು ಪ್ರಸ್ತಾಪಿಸಿದ ಸಂಗತಿಗಳಲ್ಲಿ ಕೆಲವು ಹೇಗೆ ಜನಮನರಂಜನೆಗಾಗಿ ಹೇಳಿದ ‘ಹಾಸ್ಯ’ದವು ಎನ್ನುವುದನ್ನು ಅವರೇ ವಿವರಿಸಬೇಕು.
