ಇನ್ನಾದರೂ ತಿದ್ದಿಕೊಳ್ಳಿ

7

ಇನ್ನಾದರೂ ತಿದ್ದಿಕೊಳ್ಳಿ

Published:
Updated:

‘ಅರ್ಧರಾತ್ರಿಯಲ್ಲಿ ಕೊಡೆ ಹಿಡಿಯುವ ಸಚಿವರು’ (ಪ್ರ.ವಾ., ಆ. 12) ಲೆಖನದಲ್ಲಿ ರವೀಂದ್ರ ಭಟ್ಟ ಅವರು ಪ್ರಜಾಪ್ರಭುತ್ವದ ಅತಿರೇಕಗಳ ಕುರಿತು ಸರಿಯಾಗಿಯೇ ವಿಶ್ಲೇಷಿಸಿದ್ದಾರೆ. ಹೌದು ನಮ್ಮ ಸಚಿವರು, ‘ನಾವು ಪ್ರಜಾಸೇವಕರು’ ಎಂಬುದನ್ನು ಅರ್ಥಮಾಡಿಕೊಳ್ಳುವುದರ ಜೊತೆಗೆ ಅಮೆರಿಕದ ಅಧ್ಯಕ್ಷರಾಗಿದ್ದ ಅಬ್ರಹಾಂ ಲಿಂಕನ್‌ ಅವರ ‘ಇಲ್ಲಿ ಯಾರೂ ಗುಲಾಮರಲ್ಲ, ಹೀಗಾಗಿ ಯಾರೂ ಒಡೆಯರಲ್ಲ’ ಎಂಬ ಮಾತನ್ನು ಸದಾ ನೆನಪಿನಲ್ಲಿಟ್ಟುಕೊಳ್ಳಬೇಕು.

ಜನಪ್ರತಿನಿಧಿಗಳನ್ನು ಅವರ ಹಿಂಬಾಲಕರು ವೈಭವೀಕರಿಸುವುದು ಒಂದು ಸಮಸ್ಯೆಯಾದರೆ, ಮಾಧ್ಯಮಗಳು ಸಹ ಅವರ ಬಗ್ಗೆ ಅತಿರಂಜಿತ ವರದಿಗಳನ್ನು ನೀಡುತ್ತಿವೆ. ರಾಜಕಾರಣಿಗಳನ್ನು ಉಲ್ಲೇಖಿಸುವಾಗ ನಾಡದೊರೆ, ಯುವರಾಜ... ಎಂಬೆಲ್ಲ ಪದಪುಂಜಗಳು ಬಳಕೆಯಾಗುತ್ತವೆ. ನಮ್ಮ ನಾಯಕರಲ್ಲಿ ‘ನಾವು ದೊರೆಗಳು’ ಎಂಬ ಮನೋಭಾವ ಬೆಳೆಯಲು ಇದೂ ಕಾರಣವಿರಬಹುದೇನೋ. ಇದನ್ನು ಮನಗಂಡೇ ಪ್ರೆಂಚ್‍ನ ರಾಜಕೀಯ ತತ್ವಜ್ಞಾನಿ ಮಾಂಟೆಸ್ಕ್ಯೂ ‘ಪ್ರಜಾಪ್ರಭುತ್ವಗಳು ಅತಿ ವೈಭವದಿಂದಲೂ, ರಾಜಪ್ರಭುತ್ವಗಳು ಬಡತನದಿಂದಲೂ ನಾಶವಾಗುತ್ತವೆ’ ಎಂದು ಹೇಳಿರಬೇಕು.

ವ್ಯಕ್ತಿಪೂಜೆಯಿಂದ ಆಗಬಹುದಾದ ಅನಾಹುತದ ಬಗೆಗೆ ಅಂಬೇಡ್ಕರರಿಗೂ ಆತಂಕವಿತ್ತು. ಸಂವಿಧಾನ ಜಾರಿಗೂ ಮೊದಲೇ ಅದನ್ನು ಅವರು ಮನಗಂಡಿದ್ದರು. ಈಗ ಅದು ಅನಾವರಣಗೊಳ್ಳುತ್ತಿದೆಯಷ್ಟೆ. ಇನ್ನು ಮುಂದಾದರೂ ಸಚಿವರು, ಶಾಸಕರು ಸ್ವಯಂ ಪ್ರೇರಣೆಯಿಂದ ಇಂಥ ಪ್ರವೃತ್ತಿಗೆ ಕೊನೆಹಾಡಬೇಕು. ಇದರ ಜೊತೆಯಲ್ಲಿ ತಮ್ಮ ಓಡಾಟ, ವಾಸ್ತವ್ಯ, ಸ್ವಾಗತ, ಸಮಾವೇಶಗಳಿಗೆ ಅದ್ದೂರಿತನದ ಲೇಪನ ಬೇಡವೆಂದು ಹಿಂಬಾಲಕರಿಗೆ ಸಂಘಟಕರಿಗೆ ಸೂಚನೆ ನೀಡುವುದಲ್ಲದೆ ಹೀಗೆ ಖರ್ಚು ಮಾಡುವ ಹಣವನ್ನು ಬಡವರ ಕಲ್ಯಾಣಕ್ಕೆ ಬಳಸುವಂತೆ ಸಲಹೆ ನೀಡಬೇಕು.

 

ಬರಹ ಇಷ್ಟವಾಯಿತೆ?

  • 6

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !