ವಾಲ್ಮೀಕಿಗೂ ಸ್ಥಾನ ಕೊಡಿ

ಅಸ್ಪೃಶ್ಯತೆಗೂ ಅಯೋಧ್ಯೆಯಲ್ಲಿ ರಾಮ ಮಂದಿರ ನಿರ್ಮಾಣದ ತೀರ್ಮಾನಕ್ಕೂ ಸಂಬಂಧ ಕಲ್ಪಿಸಿ ಆಡುವ ಮಾತುಗಳನ್ನು ನಂಬುವ ಸ್ಥಿತಿ ಈಗ ಇದೆಯೇ? ನೂರಾರು ವರ್ಷಗಳಿಂದ ಜಾತಿ ಭೇದಭಾವಕ್ಕೆ ಸಂಕೇತವಾಗಿರುವ ದೇವಸ್ಥಾನಗಳು ಜಾತೀಯತೆಯನ್ನು ತೊಡೆದುಹಾಕುವ ಕೆಲಸವನ್ನು ಮಾಡಬಲ್ಲವು ಎಂಬ ವಿಶ್ವಾಸ ದಮನಿತರಲ್ಲಿ ಬರುವುದಾದರೂ ಹೇಗೆ? ಉಡುಪಿಗೆ ಬಂದ ಕನಕನಿಗೆ ಆದ ಸ್ಥಿತಿಯೇ ಮುಂದೊಂದು ದಿನ ದಲಿತ, ಅಸ್ಪೃಶ್ಯ ರಾಮಭಕ್ತರಿಗೆ ಆಗಲಾರದು ಎಂದು ನಂಬುವುದು ಹೇಗೆ? ರಾಮ ಮಂದಿರ ನಿರ್ಮಾಣಕ್ಕಾಗಿ ಅದೆಷ್ಟೋ ದಲಿತ, ದಮನಿತರ ಕೈಗಳ ಮೂಲಕ ಇಟ್ಟಿಗೆಗಳು ಅಯೋಧ್ಯೆಯನ್ನು ತಲುಪಿವೆ. ಇಂತಹ ಕೈಗಳಿಗೆ ರಾಮನಿಗೆ ನಮಸ್ಕರಿಸುವ ಅವಕಾಶ ಲಭಿಸುವುದೇ? ರಾಮನನ್ನು ಆರಾಧಿಸುವ ಅವಕಾಶ ಕೆಲವೇ ಕೆಲವರಿಗೆ ಸಿಕ್ಕುವುದೆಂದಾದರೆ ರಾಮ ಮಂದಿರ ನಿರ್ಮಾಣ ಆಗಬೇಕೆನ್ನುವುದು ಇಡೀ ಹಿಂದೂ ಸಮಾಜದ ಅಪೇಕ್ಷೆ ಹೇಗಾಗುತ್ತದೆ?

ರಾಮನ ಆದರ್ಶ ಮತ್ತು ದೈವತ್ವವನ್ನು ದಾಖಲಿಸಿದವರು ವಾಲ್ಮೀಕಿ ಮಹರ್ಷಿ. ಅಂಥ ವಾಲ್ಮೀಕಿಗೆ ದೇಶದಲ್ಲಿ ಅರ್ಹ ಗೌರವ ದೊರೆತಿದೆಯೇ ಎಂದು ಯೋಚಿಸಬೇಕಾಗಿದೆ. ರಾಮನಿಗೆ ಗರ್ಭಗೃಹದಲ್ಲಿ ಸ್ಥಾನ ಕೊಟ್ಟ ವಾಲ್ಮೀಕಿಗೆ ಕನಿಷ್ಠ ಅವನ ಅಕ್ಕ-ಪಕ್ಕದಲ್ಲಾದರೂ ಸ್ಥಾನ ಕೊಡಬೇಕಲ್ಲವೇ? ರಾಮ ಮಂದಿರದ ಜೊತೆಗೆ ವಾಲ್ಮೀಕಿಗೂ ಮಂದಿರ ನಿರ್ಮಾಣ ಮಾಡುವ ನಿರ್ಣಯ ಕೈಗೊಂಡಾಗ ಧರ್ಮ ಸಂಸತ್ತಿನ ತೀರ್ಮಾನಗಳಿಗೆ ಅರ್ಥ ಬರುತ್ತದೆ.

ಹಗರಿಬೊಮ್ಮನಹಳ್ಳಿ