ವಿಪಕ್ಷಗಳಿಂದ ಪ್ರಜಾತಂತ್ರ ದುರ್ಬಲ: ಅಮಿತ್ ಶಾ

ಸೋಮವಾರ, ಜೂನ್ 17, 2019
27 °C
ಇವಿಎಂ ಕುರಿತ ವಿರೋಧಪಕ್ಷಗಳ ಹೋರಾಟಕ್ಕೆ ತಿರುಗೇಟು

ವಿಪಕ್ಷಗಳಿಂದ ಪ್ರಜಾತಂತ್ರ ದುರ್ಬಲ: ಅಮಿತ್ ಶಾ

Published:
Updated:

ನವದೆಹಲಿ: ‘ಆರನೇ ಹಂತದ ಮತದಾನ ಮುಗಿದ ನಂತರ ವಿರೋಧಪಕ್ಷಗಳವರು ಮತಯಂತ್ರದ ಕಾರ್ಯಕ್ಷಮತೆಯ ಬಗ್ಗೆ ಸಂದೇಹ ವ್ಯಕ್ತಪಡಿಸಲು ಆರಂಭಿಸಿದರು. ಎನ್‌ಡಿಎಗೆ ಬಹುಮತ ಲಭಿಸುತ್ತದೆ ಎಂಬುದನ್ನು ಮತಗಟ್ಟೆ ಸಮೀಕ್ಷೆಗಳು ಬಹಿರಂಗಗೊಳಿಸಿದ ನಂತರ ಅವರು ಹೋರಾಟವನ್ನು ಇನ್ನಷ್ಟು ತೀವ್ರಗೊಳಿಸಿದ್ದಾರೆ. ಸೋಲಿನ ಭೀತಿಯಲ್ಲಿರುವ ವಿರೋಧಪಕ್ಷಗಳವರು ಭಾರತದ ಪ್ರಜಾತಂತ್ರವನ್ನು ದುರ್ಬಲಗೊಳಿಸುತ್ತಿದ್ದಾರೆ. ಮತಗಟ್ಟೆ ಸಮೀಕ್ಷೆಗಳ ಆಧಾರದಲ್ಲಿ ಮತಯಂತ್ರಗಳ ವಿಶ್ವಾಸಾರ್ಹತೆಯನ್ನು ಪ್ರಶ್ನಿಸಲು ಹೇಗೆ ಸಾಧ್ಯ’ ಎಂದು ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಪ್ರಶ್ನಿಸಿದ್ದಾರೆ.

‘ಮೊದಲು ವಿವಿಪ್ಯಾಟ್‌ ಮತಗಳನ್ನು ಎಣಿಸಬೇಕು ಎಂದು 22 ರಾಜಕೀಯ ಪಕ್ಷಗಳು ಚುನಾವಣಾ ಆಯೋಗದ ಮುಂದಿಟ್ಟ ಬೇಡಿಕೆ ಅಸಾಂವಿಧಾನಿಕವಾದುದು’ ಎಂದಿರುವ ಶಾ, ‘ಚುನಾವಣಾ ಆಯೋಗ ಶಿಷ್ಟಾಚಾರವನ್ನು ಮುರಿಯಲು ಸಾಧ್ಯವೇ? ಸರ್ವಪಕ್ಷಗಳ ಅನುಮತಿ ಇಲ್ಲದೆ ಇಂಥ ತೀರ್ಮಾನಗಳನ್ನು ಕೈಗೊಳ್ಳಲು ಸಾಧ್ಯವಿಲ್ಲ’ ಎಂದಿದ್ದಾರೆ.

ಈಗ ಇವಿಎಂಗಳ ಬಗ್ಗೆ ಸಂದೇಹ ವ್ಯಕ್ತಪಡಿಸುತ್ತಿರುವ ಪಕ್ಷಗಳಲ್ಲಿ ಹೆಚ್ಚಿನವು ಒಂದಲ್ಲ ಒಂದು ಬಾರಿ ಇವಿಎಂ ಬಳಸಿ ನಡೆದಿದ್ದ ಚುನಾವಣೆಯಲ್ಲಿ ಗೆದ್ದು ಅಧಿಕಾರ ಹಿಡಿದವುಗಳೇ ಆಗಿವೆ. ತಾವು ಗೆದ್ದಾಗ ‘ನಮ್ಮ ಸಾಧನೆ’ ಎನ್ನುವುದು, ಸೋತಾಗ ಇವಿಎಂಗಳ ಮೇಲೆ ಹೊಣೆ ಹೊರಿಸುವುದು ಸರಿಯೇ? ಮತಯಂತ್ರಗಳ ಮೇಲೆ ವಿಶ್ವಾಸ ಇಲ್ಲದಿದ್ದರೆ ಆಗ ಅವರು ಸರ್ಕಾರ ರಚಿಸಿದ್ದೇಕೆ ಎಂದು ಶಾ ಕೇಳಿದ್ದಾರೆ.

‘ವಂಶಾಡಳಿತ ಕೊನೆಗೊಳ್ಳುವ ಭಯ’

‘ಪ್ರಜಾಪ್ರಭುತ್ವದಲ್ಲಿ ನಂಬಿಕೆ ಇಟ್ಟವರಲ್ಲಿ ಗೆದ್ದಾಗ ಸಂಭ್ರಮ, ಸೋತಾಗ ವಿನಯ ಇರಬೇಕು. ಇವೆರಡೂ ಒಂದೇ ನಾಣ್ಯದ ಎರಡು ಮುಖಗಳು. ಆದರೆ ವಂಶಾಡಳಿತಕ್ಕೆ ಸೋಲಾಗುವುದೆಂಬ ಕಾರಣದಿಂದ ಈಗ ವಿರೋಧಪಕ್ಷಗಳವರು ಮತಯಂತ್ರಗಳ ವಿರುದ್ಧ ಆರೋಪ ಮಾಡುತ್ತಿದ್ದಾರೆ’ ಎಂದು ಸಚಿವ ಮುಕ್ತಾರ್‌ ಅಬ್ಬಾಸ್‌ ನಖ್ವಿ ಆರೋಪಿಸಿದ್ದಾರೆ.

ಹಿಮ್ಮುಖ ಚಲನೆ

‘ಸೋಲುವ ಭೀತಿಯಿಂದ ಹತಾಶರಾದವರು ಮತಯಂತ್ರಗಳ ಕಾರ್ಯಕ್ಷಮತೆಯನ್ನು ಪ್ರಶ್ನಿಸುತ್ತಿದ್ದಾರೆ’ ಎಂದು ಕೇಂದ್ರದ ಸಚಿವ ರಾಮ್‌ವಿಲಾಸ್‌ ಪಾಸ್ವಾನ್‌ ಟೀಕಿಸಿದ್ದಾರೆ.

‘ಸೋಲುವ ಸಂದರ್ಭ ಎದುರಾದರೆ ವಿರೋಧಪಕ್ಷದವರೆಲ್ಲರೂ ಸೇರಿ ಮತಯಂತ್ರಗಳತ್ತ ಬೊಟ್ಟು ಮಾಡುತ್ತಾರೆ ಎಂದು ನಾನು ಹಲವು ತಿಂಗಳ ಹಿಂದೆಯೇ ಹೇಳಿದ್ದೆ. ಮತಯಂತ್ರಗಳ ಬಳಕೆಯನ್ನು ವಿರೋಧಿಸುವವರು  ಭಾರತವನ್ನು ಧನಬಲ ಮತ್ತು ತೋಳ್ಬಲಗಳಿಂದಲೇ ಚುನಾವಣಾ ಫಲಿತಾಂಶ ನಿರ್ಧಾರವಾಗುತ್ತಿದ್ದ ದಿನಗಳತ್ತ ಎಳೆದುತರಲು ಪ್ರಯತ್ನಿಸುತ್ತಿದ್ದಾರೆ’ ಎಂದು ಪಾಸ್ವಾನ್‌ ಹೇಳಿದ್ದಾರೆ.

***

ಮತಯಂತ್ರಗಳನ್ನು ತಿರುಚಿ ತೋರಿಸಿ ಎಂದು ಚುನಾವಣಾ ಆಯೋಗವು ಹಿಂದೆ ಎಲ್ಲರಿಗೂ ಬಹಿರಂಗ ಸವಾಲು ಹಾಕಿತ್ತು. ಆಗ ಯಾವ ಪಕ್ಷವೂ ಆ ಸವಾಲನ್ನು ಸ್ವೀಕರಿಸಿರಲಿಲ್ಲ.

– ಅಮಿತ್‌ ಶಾ, ಬಿಜೆಪಿ ಅಧ್ಯಕ್ಷ

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 3

    Happy
  • 0

    Amused
  • 0

    Sad
  • 0

    Frustrated
  • 5

    Angry

Comments:

0 comments

Write the first review for this !