ಶನಿವಾರ, ಏಪ್ರಿಲ್ 17, 2021
23 °C

ರಥಸಪ್ತಮಿಯ ದಿನ...

ತೇಜಶ್ರೀ Updated:

ಅಕ್ಷರ ಗಾತ್ರ : | |

Prajavani

ಅವಳಂಗೈಯ ಸೋಕನ್ನು ಬಯಸಿ ಕೊಡದಲಡಗಿದ ನೇಸರ,
ಹಾಗೇ ಕುಣಿಕುಣಿದು ತುಳುಕಿಸದೆ ಹನಿ ನೀರನ್ನೂ
ಕುಲುಕೋ ಅವಳ ಆ ಸೊಂಟದ ಮೇಲೆ ನಡೆದಿದ್ದ ಅವನು ಕಲ್ಪಕಲ್ಪಾಂತರ.

ಹೇಳದೆ ಕೇಳದೆ ಎಲ್ಲವನೂ ತೋರಿಬಿಡುವ
ಕಣ್ಣೊಳಗೆ ಕೂಡಿಡಬಾರದು ಕನಸುಗಳ ಎಂದು ನಂಬಿದ್ದಳವಳು,
ಮಡಿಕೆ ಕಾಗದದ ಚೂರೊಳಗೆ ಮಡಿಕೂತ ಕುಂಕುಮದ ಹಾಗೆ
ನೀರ ತುಳುಕಿಸದೇ ಕುಲುಕೋ ಅವಳ ಸೊಂಟದೊಳಗೆ ಇತ್ತು
ಕಾಣದ ನೂರೆಂಟು ಮಡಿಕೆಗಳ ಹದದ ಮಂತ್ರ.

ನಡೆದಳವಳು ವಾಲಾಡೋ ಕೊಡಕಂಠದ ನೀರ ನೋಡುತ್ತ
ಆಗೊಮ್ಮೆ ಈಗೊಮ್ಮೆ ಚೂರುಚೂರೇ ಮಿರುಗುತ್ತಿದ್ದ
ನೇಸರನ ಬೆಡಂಗು ಹುರಿಗೊಂಡು ಆಗ
ನೋಡಬೇಕು ಆ ಚೆಲುವು!

ಕೊಡದ ಇನ್ನಿಷ್ಟು ಆಳಕ್ಕಿಳಿಯಿತು ಅವಳ ಬೆರಳು,
ಅವಳ ಒಂದೇ ಒಂದು ತಿಳಿಸ್ಪರ್ಶದಿಂದ
ಕೊಡದ ನೀರೊಳಗಿನ ನೇಸರ ತಿಳಿವುಗೊಂಡು
ಅದೇ ಆಗ ಅವಳ ಹಣೆಗೊತ್ತಿದ್ದ ಹುಡಿಕುಂಕುಮವು
ತಿಳಿಪು ನೀರಿನೊಡನಾಡಿ ಓಕುಳಿಯಾಗಿ
ಲೋಕಕ್ಕೆ ಅಂದು ಬೆಟ್ಟನೆ ಬೆಳಗಾಗಿತ್ತು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.