ನವದೆಹಲಿ: ತಿಂಗಳಾಂತ್ಯದಲ್ಲಿನ ಮೂರು ಸರ್ಕಾರಿ ರಜಾ ದಿನಗಳಲ್ಲಿಯೂ (ಮಾ. 29, 30 ಮತ್ತು 31) ಆದಾಯ ತೆರಿಗೆ ಲೆಕ್ಕಪತ್ರ (ಐ.ಟಿ ರಿಟರ್ನ್ಸ್‌) ಸಲ್ಲಿಕೆಗೆ ಅವಕಾಶ ಕಲ್ಪಿಸಿಕೊಡಲಾಗಿದೆ.
ಆದಾಯ ತೆರಿಗೆ ಇಲಾಖೆ ಕಚೇರಿಗಳು ಮತ್ತು ಸೇವಾ ಕೇಂದ್ರಗಳು (ಎಕೆಎಸ್‌) ಮಾರ್ಚ್ 29 ರಿಂದ 31ರವರೆಗೂ ಕಾರ್ಯನಿರ್ವಹಿಸಲಿವೆ ಎಂದು ಹಣಕಾಸು ಸಚಿವಾಲಯದ ಪ್ರಕಟಣೆ ತಿಳಿಸಿದೆ.
2016–17 ಮತ್ತು 2017–18ನೇ ಹಣಕಾಸು ವರ್ಷದ ಲೆಕ್ಕಪತ್ರ ಮಾಹಿತಿ ಸಲ್ಲಿಸಲು ಹಾಗೂ 2017–18ನೇ ಹಣಕಾಸು ವರ್ಷದ ಪರಿಷ್ಕೃತ ಲೆಕ್ಕಪತ್ರ ಮಾಹಿತಿ ಸಲ್ಲಿಸಲು ಮಾರ್ಚ್ 31 ಕಡೆಯ ದಿನವಾಗಿದೆ.
ಆದರೆ, ಮಹಾವೀರ ಜಯಂತ್ರಿ ಮತ್ತು ಗುಡ್‌ ಫ್ರೈಡೆ ಪ್ರಯುಕ್ತ ಗುರುವಾರ (ಮಾ. 29) ಮತ್ತು ಶುಕ್ರವಾರ (ಮಾ. 30) ಸರ್ಕಾರಿ ರಜಾ ದಿನ. ಶನಿವಾರ ಹಣಕಾಸು ವರ್ಷದ ಅಂತಿಮ ದಿನ. ಈ ಮೂರು ದಿನಗಳ ಕಾಲ ತೆರಿಗೆ ಪಾವತಿದಾರರಿಗೆ ಯಾವುದೇ ಅನನುಕೂಲ ಆಗದಂತೆ ನೋಡಿಕೊಳ್ಳಲು ಈ ನಿರ್ಧಾರಕ್ಕೆ ಬರಲಾಗಿದೆ.
