ಕ್ರಿಕೆಟ್‌: 14 ವರ್ಷಗಳ ಬಳಿಕ ಪಾಕಿಸ್ತಾನಕ್ಕೆ ದಕ್ಷಿಣ ಆಫ್ರಿಕಾ ತಂಡ

ಎರಡು ಟೆಸ್ಟ್ ಪಂದ್ಯಗಳು ಕ್ರಮವಾಗಿ ಕರಾಚಿ ಹಾಗೂ ರಾವಲ್ಪಿಂಡಿಯಲ್ಲಿ ನಡೆಯಲಿದ್ದರೆ, ಮೂರು ಟಿ20 ಪಂದ್ಯಗಳು ಲಾಹೋರ್‌ನಲ್ಲಿ ಆಯೋಜನೆಯಾಗಿವೆ.

ದಕ್ಷಿಣ ಆಫ್ರಿಕಾ ತಂಡವು ಕೊನೆಯ ಬಾರಿ ಪಾಕಿಸ್ತಾನಕ್ಕೆ ತೆರಳಿದ್ದು 2007ರಲ್ಲಿ. ಆಗ ಕರಾಚಿಯಲ್ಲಿ ನಡೆದಿದ್ದ ಟೆಸ್ಟ್ ಪಂದ್ಯದಲ್ಲಿ 160 ರನ್‌ಗಳಿಂದ ಹರಿಣ ಪಡೆ ಜಯ ಸಾಧಿಸಿತ್ತು. ಅದಾದ ಬಳಿಕ ಉಭಯ ತಂಡಗಳು 2010 ಹಾಗೂ 2013ರಲ್ಲಿ ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ನಲ್ಲಿ (ಯುಎಇ) ಮುಖಾಮುಖಿಯಾಗಿದ್ದವು.

‘ದಕ್ಷಿಣ ಆಫ್ರಿಕಾ ತಂಡವು ಜನೆವರಿ 16ರಂದು ಕರಾಚಿಗೆ ಆಗಮಿಸಲಿದೆ. ಜನೆವರಿ 26ರಿಂದ 30ರವರೆಗೆ ಮೊದಲ ಟೆಸ್ಟ್ ಪಂದ್ಯವನ್ನು ಆಡಲಿದೆ. ಫೆಬ್ರುವರಿ 4ರಿಂದ 8ರವರೆಗೆ ಎರಡನೇ ಟೆಸ್ಟ್ ರಾವಲ್ಪಿಂಡಿಯಲ್ಲಿ ನಡೆಯಲಿದ್ದು, ಮೂರೂ ಟ್ವೆಂಟಿ–20 ಹಣಾಹಣಿಗಳು ಕ್ರಮವಾಗಿ 11, 13 ಹಾಗೂ 14ರಂದು ಲಾಹೋರ್‌ನ ಗಡಾಫಿ ಕ್ರೀಡಾಂಗಣದಲ್ಲಿ ಆಯೋಜನೆಯಾಗಿವೆ‘ ಎಂದು ಪಿಸಿಬಿ ತಿಳಿಸಿದೆ.

‘ಕರಾಚಿ ತಲುಪಿದ ಬಳಿಕ ಪ್ರವಾಸಿ ತಂಡದ ಆಟಗಾರರು, ಕ್ವಾರಂಟೈನ್‌ ಅವಧಿ ಪೂರೈಸಬೇಕು. ತರಬೇತಿ ಹಾಗೂ ತಂಡದ ಆಟಗಾರರ ಮಧ್ಯೆಯೇ ಅಭ್ಯಾಸ ಪಂದ್ಯಗಳು ನಡೆಯಲಿವೆ‘ ಎಂದು ಪಿಸಿಬಿ ಹೇಳಿದೆ.