ಪ್ರತ್ಯೇಕವಾಸದ ನಿಯಮ ಉಲ್ಲಂಘನೆ: ವಿಂಡೀಸ್‌ ಕ್ರಿಕೆಟಿಗರ ಅಭ್ಯಾಸಕ್ಕೆ ತಡೆ
ವೆಲ್ಲಿಂಗ್ಟನ್‌: ಕೋವಿಡ್‌–19 ನಿಯಂತ್ರಣದ ಹಿನ್ನೆಲೆಯಲ್ಲಿ ಜಾರಿಗೊಳಿಸಲಾಗಿದ್ದ 14 ದಿನಗಳ ಕ್ವಾರಂಟೈನ್‌ ಅವಧಿಯಲ್ಲಿವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಆಟಗಾರು ನಿಯಮಗಳನ್ನು ಉಲ್ಲಂಘಿಸಿದ್ದು ಕಂಡುಬಂದಿದೆ. ಹೀಗಾಗಿ ಅವರು ಅಭ್ಯಾಸ ನಡೆಸಲು ಇದ್ದ ಅನುಮತಿಯನ್ನು ನ್ಯೂಜಿಲೆಂಡ್‌ ಸರ್ಕಾರ ಹಿಂತೆಗೆದುಕೊಂಡಿದೆ.
ಕೆರಿಬಿಯನ್‌ ತಂಡವು ಆತಿಥೇಯರ ವಿರುದ್ಧ ಮೂರು ಟ್ವೆಂಟಿ–20 ಹಾಗೂ ಎರಡು ಟೆಸ್ಟ್ ಪಂದ್ಯಗಳನ್ನು ಆಡಲು ನ್ಯೂಜಿಲೆಂಡ್‌ಗೆ ಬಂದಿಳಿದಿದೆ. ನವೆಂಬರ್ 27ರಿಂದ ಟಿ–20 ಪಂದ್ಯದೊಂದಿಗೆ ಸರಣಿ ಆರಂಭವಾಗಲಿದೆ.
‘ವೆಸ್ಟ್‌ ಇಂಡೀಸ್‌ ಆಟಗಾರರು ನಿಯಮಗಳನ್ನು ಉಲ್ಲಂಘಿಸಿ, ಹಜಾರದಲ್ಲಿ ಎಲ್ಲರೂ ಬೆರೆತು, ಆಹಾರವನ್ನು ಹಂಚಿಕೊಳ್ಳುತ್ತಿರುವ ದೃಶ್ಯವು ತಂಡವು ತಂಗಿರುವ ಕ್ರೈಸ್ಟ್‌ಚರ್ಚ್‌ ಹೊಟೇಲ್‌ನ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಸೆರೆಯಾಗಿದೆ‘ ಎಂದು ನ್ಯೂಜಿಲೆಂಡ್‌ನ ಆರೋಗ್ಯ ಸಚಿವಾಲಯ ಹೇಳಿದೆ.
‘ಈ ಎಲ್ಲ ಪ್ರಕ್ರಿಯೆಗಳು ಹೊಟೇಲ್‌ ಆವರಣದೊಳಗೇ ನಡೆದಿರುವುದರಿಂದ ಸಾರ್ವಜನಿಕರಿಗೆ ಯಾವುದೇ ಅಪಾಯವಿಲ್ಲ‘ ಎಂದೂ ಆರೋಗ್ಯ ಸಚಿವಾಲಯ ತಿಳಿಸಿದೆ.
‘ಕೋವಿಡ್‌–19 ನಿಯಮಗಳ ಅನ್ವಯ ಇರುವ 14 ದಿನಗಳ ಪೈಕಿ 12 ದಿನಗಳ ಪ್ರತ್ಯೇಕವಾಸವನ್ನು ವಿಂಡೀಸ್‌ ತಂಡವು ಪೂರ್ಣಗೊಳಿಸಿದೆ. ನಿಯಮ ಉಲ್ಲಂಘಿಸಿದ ಕಾರಣ, ಸಂಪೂರ್ಣ ಅವಧಿ ಮುಗಿಯುವವರೆಗೆ ತಂಡದ ತಾಲೀಮಿಗೆ ಅವಕಾಶ ನೀಡಲಾಗಿಲ್ಲ. ಏನಾದರೂ ಕಳವಳಕಾರಿ ಘಟನೆಗಳು ನಡೆದರೆ ಕ್ವಾರಂಟೈನ್‌ ಅವಧಿಯನ್ನು ವಿಸ್ತರಿಸಲಾಗುವುದು‘ ಎಂದು ಸಚಿವಾಲಯ ಹೇಳಿದೆ.
ನಿಯಮ ಉಲ್ಲಂಘಿಸಿರುವ ಕುರಿತು ಪುರಾವೆಗಳನು ವೆಸ್ಟ್‌ ಇಂಡೀಸ್‌ ತಂಡದ ಆಡಳಿತ ಮಂಡಳಿಗೆ ಕಳುಹಿಸಲಾಗಿದೆ. ಈ ಕುರಿತು ಮಂಡಳಿಯು ಸ್ವತಃ ತನಿಖೆ ನಡೆಸಿ ಅಗತ್ಯವೆನಿಸಿದರೆ ದಂಡ ವಿಧಿಸಬಹುದಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.