ಕತಾರ್‌ ದೇಶದ ಆತಿಥ್ಯದಲ್ಲಿ ನಡೆಯುತ್ತಿರುವ ಫಿಫಾ ವಿಶ್ವಕಪ್ ಟೂರ್ನಿ ಹತ್ತಾರು ರೋಚಕ ಸಂಗತಿಗಳನ್ನು ದಾಖಲಿಸಿದೆ. ನವೆಂಬರ್ 20ರಿಂದ ಇಲ್ಲಿಯವರೆಗೆ ನಡೆದ ಒಟ್ಟು 56 ಪಂದ್ಯಗಳಲ್ಲಿಯೂ ಒಂದಿಲ್ಲೊಂದು ವಿಶೇಷಗಳಿದ್ದವು. ಏಷ್ಯಾ ಖಂಡದ ತಂಡಗಳೂ ಈ ಬಾರಿ ತಮ್ಮ ಶಕ್ತಿ ಮೆರೆದವು. ಅದರಲ್ಲೂ ಜಪಾನ್, ದಕ್ಷಿಣ ಕೋರಿಯಾ ಮತ್ತು ಸೌದಿ ಅರೇಬಿಯಾ ತಂಡಗಳು ವಿಶ್ವದ ಘಟಾನುಘಟಿ ತಂಡಗಳಿಗೇ ಸೋಲಿನ ಕಹಿ ಉಣಿಸಿದ್ದು ವಿಶೇಷ. ಈ ಎಲ್ಲ ಕ್ಲಿಷ್ಟ ಸವಾಲುಗಳನ್ನು ದಾಟಿಯೂ ಫುಟ್‌ಬಾಲ್ ಕ್ಷೇತ್ರದ ಸಮಕಾಲೀನ ದಿಗ್ಗಜ ಆಟಗಾರರು ಇರುವ ಪ್ರಮುಖ ತಂಡಗಳು ಎಂಟರ ಘಟ್ಟಕ್ಕೆ ಬಂದು ನಿಂತಿವೆ. ಹೋದ ಬಾರಿಯ ಚಾಂಪಿಯನ್ ಫ್ರಾನ್ಸ್‌, ರನ್ನರ್ಸ್ ಅಪ್ ಕ್ರೊವೇಷ್ಯಾ, ಬ್ರೆಜಿಲ್, ಅರ್ಜೆಂಟೀನಾ, ಮೊರಕ್ಕೊ, ಪೋರ್ಚುಗಲ್, ಇಂಗ್ಲೆಂಡ್ ಮತ್ತು ನೆದರ್ಲೆಂಡ್ಸ್‌ ತಂಡಗಳು ತಮ್ಮ ಸಾಮರ್ಥ್ಯವನ್ನು ಪಣಕ್ಕೊಡ್ಡಲಿವೆ. ಈ ಎಲ್ಲ ತಂಡಗಳ ತಾರಾಮಣಿಗಳು ಇಲ್ಲಿ ಕಂಗೊಳಿಸಲು ಸಿದ್ಧರಾಗಿದ್ದಾರೆ.
