ಪುಣೆ: ಹಾಲಿ ಚಾಂಪಿಯನ್ ತಂಡವು ಎಎಫ್‌ಸಿ ಏಷ್ಯಾಕಪ್ ಮಹಿಳಾ ಫುಟ್‌ಬಾಲ್ ಟೂರ್ನಿಯಲ್ಲಿ ಭರ್ಜರಿ ಆರಂಭ ಮಾಡಿದೆ. ಶುಕ್ರವಾರ ನಡೆದ ಪಂದ್ಯದಲ್ಲಿ ಆ ತಂಡವು 5–0ಯಿಂದ ಮ್ಯಾನ್ಮಾರ್‌ ತಂಡವನ್ನು ಸೋಲಿಸಿತು.
ಶಿವ ಛತ್ರಪತಿ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ‘ಸಿ’ ಗುಂಪಿನ ಈ ಹಣಾಹಣಿಯಲ್ಲಿ ಜಪಾನ್ ಆರಂಭದಿಂದಲೇ ಪಾರಮ್ಯ ಮೆರೆಯಿತು.
ವಿಜೇತ ತಂಡದ ಪರ ಯುಯಿ ಹಸೆಗವಾ (47 ಮತ್ತು 90+2ನೇ ನಿಮಿಷ), ರಿಕೊ ಯುಕಿ (22ನೇ ನಿಮಿಷ), ಹಿಕಾರು ನಮೊಟೊ (52ನೇ ನಿಮಿಷ) ಮತ್ತು ಯುಯಿ ನರುಮಿಯಾ (70) ಕಾಲ್ಚಳಕ ತೋರಿದರು.
ಮುಂದಿನ ಪಂದ್ಯದಲ್ಲಿ ಜಪಾನ್ ತಂಡವು ಸೋಮವಾರ ವಿಯೆಟ್ನಾಂ ತಂಡವನ್ನೂ, ಮ್ಯಾನ್ಮಾರ್‌, ಕೊರಿಯಾ ತಂಡವನ್ನೂ ಎದುರಿಸಲಿವೆ.
ಆಸ್ಟ್ರೇಲಿಯಾಗೆ ಭರ್ಜರಿ ಜಯ: ‘ಬಿ’ ಗುಂಪಿನ ಪಂದ್ಯದಲ್ಲಿ ಸಮಂತಾ ಕೆರ್‌ (9, 11, 26, 36, 54ನೇ ನಿ.) ಮತ್ತು ಎಮಿಲಿ ವಾನ್‌ ಎಗ್‌ಮಂಡ್‌ (39, 57, 59, 69ನೇ ನಿ.) ಗಳಿಸಿದ ಗೋಲುಗಳ ನೆರವಿನಿಂದ ಆಸ್ಟ್ರೇಲಿಯಾ ಇಂಡೊನೇಷ್ಯಾ ಎದುರು 18–0 ಗೋಲುಗಳಿಂದ ಗೆದ್ದಿತು.
