ಟೂರ್ನಿಯಲ್ಲಿ ‘ಹ್ಯಾಟ್ರಿಕ್’ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿರುವ ಆಸ್ಟ್ರೇಲಿಯಾ ತಂಡ ಆರಂಭದಿಂದಲೇ ಚೀನಾದ ‘ಮಹಾ ಗೋಡೆ’ ಕೆಡವಲು ಮುಂದಾಯಿತು. 10ನೇ ನಿಮಿಷದಲ್ಲಿ ಲಭಿಸಿದ ಪೆನಾಲ್ಟಿ ಕಾರ್ನರ್ ಅವಕಾಶವನ್ನು ಬ್ಲೇಕ್ ಗೋವರ್ಸ್ ಸದುಪಯೋಗಪಡಿಸಿಕೊಂಡರು. 15ನೇ ನಿಮಿಷದಲ್ಲಿ ಈ ತಂಡಕ್ಕೆ ಮತ್ತೊಂದು ಪೆನಾಲ್ಟಿ ಕಾರ್ನರ್ ಲಭ್ಯವಾಯಿತು. ಈ ಅವಕಾಶದಲ್ಲಿ ಆ್ಯರನ್ ಜಲೇವ್ಸ್ಕಿ ಚೆಂಡನ್ನು ಗುರಿ ಮುಟ್ಟಿಸಿದರು. ಇದರ ಬೆನ್ನಲ್ಲೇ (16ನೇ ನಿ.) ಟಾಮ್ ಕ್ರೇಗ್, ಫೀಲ್ಡ್ ಗೋಲು ಬಾರಿಸಿ ಎಡ್ಡಿ ಪಡೆಗೆ 3–0 ಮುನ್ನಡೆ ತಂದುಕೊಟ್ಟರು.