ಆಲ್‌ ಇಂಗ್ಲೆಂಡ್ ಬ್ಯಾಡ್ಮಿಂಟನ್ ಚಾಂಪಿಯನ್‌ಷಿಪ್: ಸೆಮಿಗೆ ತ್ರಿಶಾ– ಗಾಯತ್ರಿ ಜೋಡಿ

ಶುಕ್ರವಾರ ನಡೆದ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಭಾರತದ ಜೋಡಿ 21–14, 18–21, 21–12ರಲ್ಲಿ ಚೀನಾದ ಲಿ ವೆನ್ ಮೀ ಮತ್ತು ಲಿಯು ಕ್ಸುವಾನ್ ಅವರನ್ನು ಮಣಿಸಿತು. ತ್ರಿಶಾ ಮತ್ತು ಗಾಯತ್ರಿ ಕಳೆದ ಬಾರಿಯೂ ಇಲ್ಲಿ ನಾಲ್ಕರಘಟ್ಟ ಪ್ರವೇಶಿಸಿದ್ದರು.

64 ನಿಮಿಷ ನಡೆದ ಹಣಾಹಣಿಯಲ್ಲಿ ಗಾಯತ್ರಿ ಅವರು ನೆಟ್‌ ಬಳಿ ಚುರುಕಿನ ಆಟವಾಡಿದರೆ, ತ್ರಿಷಾ ಅವರು ಕೋರ್ಟ್‌ನ ಹಿಂಭಾಗದಿಂದ ವೇಗದ ಸ್ಮ್ಯಾಷ್‌ಗಳು ಮತ್ತು ಡ್ರಾಪ್‌ ಶಾಟ್‌ಗಳ ಮೂಲಕ ಮಿಂಚಿದರು.

ಮೊದಲ ಗೇಮ್‌ನ ಆರಂಭದಲ್ಲೇ ಭಾರತದ ಜೋಡಿ 6–2 ರಲ್ಲಿ ಮುನ್ನಡೆ ಗಳಿಸಿತು. ಚೀನಾದ ಆಟಗಾರ್ತಿಯರು ಮರುಹೋರಾಟ ನಡೆಸಿ 6–6 ರಲ್ಲಿ ಸಮಬಲ ಸಾಧಿಸಿದರು. ಆದರೂ ವಿರಾಮದ ವೇಳೆಗೆ ತ್ರಿಶಾ–ಗಾಯತ್ರಿ 11–8 ರಲ್ಲಿ ಮೇಲುಗೈ ಪಡೆದರು. ಆ ಬಳಿಕ ಆಕ್ರಮಣಕಾರಿ ಆಟದ ಮೂಲಕ 18–12ರಲ್ಲಿ ಮುನ್ನಡೆ ಪಡೆದರಲ್ಲದೆ, ಗೇಮ್‌ ತಮ್ಮದಾಗಿಸಿಕೊಂಡರು.

ಎರಡನೇ ಗೇಮ್‌ನ ಆರಂಭದಲ್ಲಿ ಭಾರತದ ಜೋಡಿ 5–1, 10–6 ರಲ್ಲಿ ಮುನ್ನಡೆ ಸಾಧಿಸಿದ್ದರೂ, ಆ ಬಳಿಕ ಚೀನಾ ಜೋಡಿ ಮರುಹೋರಾಟ ನಡೆಸಿತು. ಹೊಂದಾಣಿಕೆಯ ಆಟವಾಡಿ ಗೇಮ್‌ ಜಯಿಸಿ ಪಂದ್ಯವನ್ನು ಮೂರನೇ ಗೇಮ್‌ಗೆ ಕೊಂಡೊಯ್ದಿತು.

ನಿರ್ಣಾಯಕ ಗೇಮ್‌ನಲ್ಲಿ ಮತ್ತೆ ಲಯ ಕಂಡುಕೊಂಡ ಭಾರತದ ಜೋಡಿ ಸತತ ಆರು ಪಾಯಿಂಟ್ಸ್‌ ಸಂಗ್ರಹಿಸಿ 8–1 ರಲ್ಲಿ ಮುನ್ನಡೆ ಪಡೆಯಿತು. ನಂತರ ಒತ್ತಡಕ್ಕೆ ಒಳಗಾಗದೆ 15–5, 15–8ರಲ್ಲಿ ಮೇಲುಗೈ ಕಾಪಾಡಿಕೊಂಡು ಗೇಮ್‌ ಜಯಿಸಿ ಸೆಮಿಯತ್ತ ಹೆಜ್ಜೆಯಿಟ್ಟಿತು.

ಸಿಂಗಲ್ಸ್‌ನಲ್ಲಿ ಸವಾಲು ಅಂತ್ಯ: ಚಾಂಪಿಯನ್‌ಷಿಪ್‌ನ ಸಿಂಗಲ್ಸ್‌ ವಿಭಾಗದಲ್ಲಿ ಭಾರತದ ಸವಾಲಿಗೆ ತೆರೆಬಿತ್ತು. ಎಚ್‌.ಎಸ್‌.ಪ್ರಣಯ್‌ ಮತ್ತು ಕಿದಂಬಿ ಶ್ರೀಕಾಂತ್ ಅವರು ಗುರುವಾರ ನಡೆದ ಪುರುಷರ ಸಿಂಗಲ್ಸ್‌ ವಿಭಾಗದ 16ರ ಘಟ್ಟದ ಪಂದ್ಯದಲ್ಲಿ ಪರಾಭವಗೊಂಡರು.

ಶ್ರೀಕಾಂತ್‌ ಅವರು 17–21, 15–21 ರಲ್ಲಿ ಏಳನೇ ಶ್ರೇಯಾಂಕದ ಆಟಗಾರ ಜಪಾನ್‌ನ ಕೊದೈ ನರವೊಕಾ ಎದುರು ಸೋತರು. ಈ ಪಂದ್ಯ 51 ನಿಮಿಷ ನಡೆಯಿತು.

ಪ್ರಣಯ್‌ 20–22, 21–15, 17–21 ರಲ್ಲಿ ಇಂಡೊನೇಷ್ಯಾದ ಆಂಥೋನಿ ಸಿನಿಸುಕ ಗಿಂಟಿಂಗ್‌ ಎದುರು ಸೋತರು. ಒಂದು ಗಂಟೆ ಎಂಟು ನಿಮಿಷ ನಡೆದ ಹೋರಾಟದಲ್ಲಿ ಪ್ರಣಯ್‌ ಎದುರಾಳಿಗೆ ಪ್ರಬಲ ಪೈಪೋಟಿ ಒಡ್ಡಿದರು. ಮೊದಲ ಗೇಮ್‌ ಸೋತರೂ ಎರಡನೇ ಗೇಮ್ ಗೆದ್ದು ಸಮಬಲ ಸಾಧಿಸಿದರು. ನಿರ್ಣಾಯಕ ಗೇಮ್‌ನಲ್ಲಿ ಒತ್ತಡಕ್ಕೆ ಒಳಗಾಗಿ ಪಂದ್ಯ ಸೋತರು.