ವಿಶ್ವ ಕುಸ್ತಿ ಚಾಂಪಿಯನ್‌ಷಿಪ್‌: ಟಕುಟೊಗೆ ಮಣಿದ ಬಜರಂಗ್‌

ವಿಶ್ವ ಕುಸ್ತಿ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನ ಗೆಲ್ಲುವ ಭರವಸೆಯೊಂದಿಗೆ ಕಣಕ್ಕೆ ಇಳಿದ ಬಜರಂಗ್‌ ಬೆಳ್ಳಿಯ ಪದಕಕ್ಕೆ ತೃಪ್ತಿಪಟ್ಟುಕೊಂಡರು. 65 ಕೆಜಿ ವಿಭಾಗದವರ ಫೈನಲ್ ಬೌಟ್‌ ನಲ್ಲಿ ಅವರು 19 ವರ್ಷದ ಟಕುಟೊ ಒಟೊಗುರೊಗೆ 16–9ರಿಂದ ಮಣಿದರು.

ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನ ಗೆದ್ದ ಅತ್ಯಂತ ಕಿರಿಯ ಕುಸ್ತಿಪಟು ಎಂಬ ಖ್ಯಾತಿ ಟಕುಟೊ ಅವರದಾಯಿತು.

ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಸುಶೀಲ್ ಕುಮಾರ್ ಮಾತ್ರ ಭಾರತದ ಪರವಾಗಿ ಚಿನ್ನ ಗೆದ್ದಿದ್ದಾರೆ. ಚಿನ್ನದ ಸಾಧನೆ ಮಾಡಿದ ಎರಡನೇ ಕುಸ್ತಿಪಟು ಎಂಬ ಹಿರಿಮೆಯನ್ನು ತಮ್ಮದಾಗಿಸಿಕೊಳ್ಳುವ ಭರವಸೆಯೊಂದಿಗೆ ಬಜರಂಗ್ ಸ್ಪರ್ಧೆಗೆ ಇಳಿದಿದ್ದರು.ಫೈನಲ್‌ನಲ್ಲಿ ಗೆದ್ದಿದ್ದರೆ ಒಂದೇ ವರ್ಷದಲ್ಲಿ ಎಲ್ಲ ಪ್ರಮುಖ ಟೂರ್ನಿಗಳಲ್ಲೂ ಚಿನ್ನ ಗೆದ್ದ ಮೊದಲ ಭಾರತೀಯ ಎಂಬ ದಾಖಲೆಯೂ ಅವರದಾಗುತ್ತಿತ್ತು. ಆದರೆ 24 ವರ್ಷದ ಬಜರಂಗ್‌ ಜಪಾನ್‌ನ ‘ಎಳೆಯ’ ಪೈಲ್ವಾನನ ಮುಂದೆ ನಿರುತ್ತರರಾದರು.

ಆರಂಭದಲ್ಲಿ 5–0ಯಿಂದ ಮುನ್ನಡೆ ಗಳಿಸಿದ ಟಕುಟೊ, ಭಾರತದ ಕುಸ್ತಿ‍ಪಟುವನ್ನು ದಂಗಾಗಿಸಿದರು. ಮರು ಹೋರಾಟ ನಡೆಸಿದ ಪೂನಿಯಾ 4–5ರಿಂದ ಹಿನ್ನಡೆಯನ್ನು ತಗ್ಗಿಸಿಕೊಂಡರು. ನಂತರ ಟಕುಟೊ 7–6 ಮತ್ತು 9–6ರಿಂದ ಮುನ್ನಡೆದರು.

ದ್ವಿತೀಯಾರ್ಧದಲ್ಲಿ ಪೂನಿಯಾ ಅವರಿಂದ ಹೆಚ್ಚಿನ ಹೋರಾಟ ಕಂಡು ಬರಲಿಲ್ಲ. ಹೀಗಾಗಿ ಟಕುಟೊ ಭಾರಿ ಅಂತರದಿಂದ ಗೆದ್ದು ಪ್ರಶಸ್ತಿ ತಮ್ಮದಾಗಿಸಿಕೊಂಡರು.