ಮುಂಬೈ: ದೇಶಿ ಆಟಗಾರರ ‘ಬಿ’ ವಿಭಾಗದಲ್ಲಿ ಡಿಫೆಂಡರ್ ಮಹಿಂದರ್ ಸಿಂಗ್ ಹಾಗೂ ರೈಡರ್ ಮಂಜಿತ್ ಸಿಂಗ್ ದೊಡ್ಡ ಮೊತ್ತಕ್ಕೆ ಹರಾಜಾಗಿದ್ದಾರೆ. ಈ ಮೂಲಕ ಪ್ರೊ ಕಬಡ್ಡಿ ಲೀಗ್ನ (ಪಿಕೆಎಲ್) ಏಳನೇ ಆವೃತ್ತಿಯ ಹರಾಜು ಪ್ರಕ್ರಿಯೆ ಮಂಗಳವಾರ ಮುಕ್ತಾಯಗೊಂಡಿದೆ.
ಬೆಂಗಳೂರು ಬುಲ್ಸ್ ತಂಡವುಮಹಿಂದರ್ ಅವರನ್ನು₹80 ಲಕ್ಷಕ್ಕೆ ಖರೀದಿಸಿದರೆ, ಮಂಜಿತ್ ಅವರನ್ನು ₹63 ಲಕ್ಷಕ್ಕೆ ಪುಣೇರಿ ಪಲ್ಟನ್ ತಂಡ ಖರೀದಿಸಿತು. ಆಲ್ರೌಂಡರ್ ಸಂದೀಪ್ ನರ್ವಾಲ್ ಅವರಿಗೆ ಯು ಮುಂಬಾ ತಂಡವು ₹89 ಲಕ್ಷ ನೀಡಿ ತನ್ನತ್ತ ಸೆಳೆದುಕೊಂಡಿತು.
ಎರಡು ದಿನಗಳ ಕಾಲ ನಡೆದ ಹರಾಜಿನಲ್ಲಿ ದೇಶಿ ಹಾಗೂ ವಿದೇಶದ 200 ಆಟಗಾರರನ್ನು ಖರೀದಿಸಲು 12 ಫ್ರಾಂಚೈಸ್ಗಳು ₹50 ಕೋಟಿ ಖರ್ಚು ಮಾಡಿವೆ.
‘ಎ’ ವಿಭಾಗದಲ್ಲಿ ರೈಡರ್ ಸಿದ್ಧಾರ್ಥ್ ದೇಸಾಯಿ (₹1.45 ಕೋಟಿ) ನಿತಿನ್ ತೋಮರ್ (₹1.20 ಕೋಟಿ) ಹರಾಜಾಗುವ ಮೂಲಕ ಗರಿಷ್ಠ ಮೌಲ್ಯ ಪಡೆದ ಆಟಗಾರರರೆನಿಸಿದ್ದರು. ತೆಲುಗು ಟೈಟನ್ಸ್ ಹಾಗೂ ಪುಣೇರಿ ಪಲ್ಟನ್ ತಂಡಗಳು ಕ್ರಮವಾಗಿ ಇವರನ್ನು ಸೋಮವಾರ ಖರೀದಿಸಿದ್ದವು.
ಇರಾನ್ ದೇಶದ ಮೊಹಮ್ಮದ್ ಇಸ್ಮಾಯಿಲ್ ನಬಿಬಕ್ಸ್ ಅವರು ₹77.75 ಲಕ್ಷ ಪಡೆಯುವ ಮೂಲಕ ಗರಿಷ್ಠ ಮೊತ್ತಕ್ಕೆ ಖರೀದಿಯಾದ ವಿದೇಶಿ ಆಟಗಾರ ಎಂಬ ಶ್ರೇಯ ತಮ್ಮದಾಗಿಸಿಕೊಂಡರು. ಪಿಕೆಎಲ್ ಏಳನೇ ಆವೃತ್ತಿಯ ಪಂದ್ಯಗಳು ಜುಲೈ 19ರಿಂದ ಅಕ್ಟೋಬರ್ 9ರವರೆಗೆ ನಡೆಯಲಿವೆ.