ಶನಿವಾರ, ಜೂನ್ 19, 2021
27 °C

ಏಷ್ಯನ್ ಚಾಂಪಿಯನ್‌ಷಿಪ್‌: ದುಬೈ ತಲುಪಿದ ಭಾರತ ಬಾಕ್ಸಿಂಗ್ ತಂಡ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ನವದೆಹಲಿ: ಮೇರಿ ಕೋಮ್ ಹಾಗೂ ಅಮಿತ್‌ ಪಂಗಲ್ ಅವರನ್ನೊಳಗೊಂಡ ಭಾರತದ ಬಾಕ್ಸಿಂಗ್ ತಂಡವು ಏಷ್ಯನ್ ಚಾಂಪಿಯನ್‌ಷಿಪ್‌ನಲ್ಲಿ ಪಾಲ್ಗೊಳ್ಳಲು ಶನಿವಾರ ದುಬೈ ತಲುಪಿತು. ಆಡಳಿತಾತ್ಮಕ ದಾಖಲೆಗಳ ಸಮಸ್ಯೆಯಿಂದಾಗಿ ಬಾಕ್ಸರ್‌ಗಳಿದ್ದ ವಿಮಾನವು ನಿಲ್ದಾಣದಲ್ಲಿ ಲ್ಯಾಂಡ್ ಆಗಲು ವಿಳಂಬವಾಗಿತ್ತು. ಹೀಗಾಗಿ ನಿಗದಿಗಿಂತ ಹೆಚ್ಚು ಹೊತ್ತು ಅದು ಆಗಸದಲ್ಲಿ ಹಾರಾಡಿತ್ತು.

ಸೋಮವಾರದಿಂದ ಈ ಟೂರ್ನಿಯು ಆರಂಭವಾಗಬೇಕಿದೆ. ಜುಲೈನಲ್ಲಿ ನಿಗದಿಯಾಗಿರುವ ಒಲಿಂಪಿಕ್ಸ್‌ಗೂ ಮೊದಲು ನಡೆಯಲಿರುವ ಪ್ರಮುಖ ಬಾಕ್ಸಿಂಗ್ ಟೂರ್ನಿ ಇದು.

‘ಪ್ರವಾಸಕ್ಕೆ ಅನುಮೋದನೆ ಪಡೆಯುವ ವಿಷಯದಲ್ಲಿ ಸ್ವಲ್ಪ ಗೊಂದಲ ಮೂಡಿತ್ತು. ಅದು ಈಗ ಪರಿಹರಿಸಲ್ಪಟ್ಟಿದೆ. ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿರುವ ಭಾರತೀಯ ರಾಯಭಾರಿ ಕಚೇರಿ ಅಧಿಕಾರಿಗಳಿಗೆ ಕೃತಜ್ಞತೆಗಳು. ವಿಮಾನ ಲ್ಯಾಂಡ್‌ ಆಗಸಲು ಸ್ವಲ್ಪ ಸಮಯ ತೆಗೆದುಕೊಂಡರೂ ಬಾಕ್ಸರ್‌ಗಳು ಈಗ ಹೊಟೇಲ್ ತಲುಪಿದ್ದಾರೆ. ಬಾಕ್ಸರ್‌ಗಳಿಗೆ ಕೋವಿಡ್‌ ಪರೀಕ್ಷೆಯನ್ನೂ ಮಾಡಲಾಗಿದೆ‘ ಎಂದು ತಂಡದ ಮೂಲಗಳು ಹೇಳಿವೆ.

ವಿನೋದ್‌ಗೆ ಕೋವಿಡ್‌: ಚಾಂಪಿಯನ್‌ಷಿಪ್‌ನ 49 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಬೇಕಿದ್ದ ವಿನೋದ್ ತನ್ವರ್ ಅವರಿಗೆ ಕೋವಿಡ್ ಖಚಿತಪಟ್ಟಿದೆ. ಹೀಗಾಗಿ ಅವರು ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ. ಸದ್ಯ ಅವರು ಭಾರತದಲ್ಲೇ ಇದ್ದಾರೆ.

‘ಕೋವಿಡ್‌ ಖಚಿತಪಟ್ಟ ಕಾರಣ, ಏಷ್ಯನ್ ಚಾಂಪಿಯನ್‌ಷಿಪ್‌ಗೆ ಆಯ್ಕೆ ಮಾಡಲಾದ ತಂಡದಿಂದ ವಿನೋದ್ ತನ್ವರ್‌ ಅವರನ್ನು ಕೈಬಿಡಲಾಗಿದೆ‘ ಎಂದು ಭಾರತ ಬಾಕ್ಸಿಂಗ್ ಫೆಡರೇಷನ್ ತಿಳಿಸಿದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು