ರಾಷ್ಟ್ರೀಯ ಕಾರ್ಟಿಂಗ್: ರುಹಾನ್, ರೋಹನ್, ನಿಖಿಲೇಶ್‌ಗೆ ಪ್ರಶಸ್ತಿ
ಅಕ್ಷರ ಗಾತ್ರ :ಆ |ಆ |ಆ
ಬೆಂಗಳೂರು: ನಗರದ ರೇಸರ್‌ಗಳಾದ ರುಹಾನ್ ಆಳ್ವ, ರೋಹನ್ ಮಾದೇಶ್ ಮತ್ತು ನಿಖಿಲೇಶ್ ರಾಜು ಅವರು ಈಚೆಗೆ ನಡೆದ ಮೆಕೊ ಎಫ್‌ಎಂಎಸ್‌ಸಿಐ ರಾಷ್ಟ್ರೀಯ ಕಾರ್ಟಿಂಗ್‌ನಲ್ಲಿ ವಿವಿಧ ವಿಭಾಗಗಳ ಪ್ರಶಸ್ತಿ ಗೆದ್ದುಕೊಂಡರು.
ಸೀನಿಯರ್ ವಿಭಾಗದಲ್ಲಿ ಅಮೋಘ ಸಾಮರ್ಥ್ಯ ತೋರಿದ ರುಹಾನ್ ಅವರು ಎನ್‌ಸಿ ರೇಸಿಂಗ್‌ ಎಂಸ್ಪೋರ್ಟ್‌ x30 ಇಂಡಿಯಾ ಕ್ಲಾಸ್ ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಜೂನಿಯರ್ ವಿಭಾಗದ ಪ್ರಶಸ್ತಿ ರೋಹನ್ ಅವರ ಪಾಲಾದರೆ ನಿಖಿಲೇಶ್ ರಾಜು ಅವರು ಕೆಡೆಟ್ ವಿಭಾಗದ ಚಾಂಪಿಯನ್ ಆದರು. ರೋಹನ್ ಮತ್ತು ನಿಖಿಲೇಶ್ ಪ್ರತಿಸ್ಪರ್ಧಿಗಳ ಕಠಿಣ ಸವಾಲು ಮೆಟ್ಟಿನಿಂತು ಗಮನ ಸೆಳೆದರು.
15 ವರ್ಷದ ರುಹಾನ್ ಐದು ಸುತ್ತುಗಳಲ್ಲೂ ಮೆಚ್ಚುಗೆಯ ಆಟವಾಡಿ 167 ಪಾಯಿಂಟ್ ಕಲೆ ಹಾಕಿದರು. ಎರಡು, ಮೂರು ಮತ್ತು ನಾಲ್ಕನೇ ಸುತ್ತುಗಳಲ್ಲಿ ತಲಾ ನಾಲ್ಕು ರೇಸ್‌ಗಳಲ್ಲಿ ಆಧಿಪತ್ಯ ಸ್ಥಾಪಿಸಿದ್ದು ಅವರು ಪ್ರಶಸ್ತಿ ಗಳಿಸಲು ನೆರವಾಯಿತು. ಕೊನೆಯ ಸುತ್ತಿನಲ್ಲಿ ಒಂದು ಪ್ರಮಾದ ಎಸಗಿದರು.
ಜೂನಿಯರ್ ವಿಭಾಗದಲ್ಲಿ ರೋಹನ್ 146 ಪಾಯಿಂಟ್ ಗಳಿಸಿದರು. 134 ಪಾಯಿಂಟ್ ಗೆದ್ದ ಜೇಡನ್ ಪರಿಯತ್ ಮತ್ತು 130 ಪಾಯಿಂಟ್ ಗಳಿಸಿದ ಸಹೋದರ ಇಶಾನ್ ಅವರಿಂದ ರೋಹನ್‌ಗೆ ಪ್ರಬಲ ಸ್ಪರ್ಧೆ ಎದುರಾಗಿತ್ತು.
ಸೀನಿಯರ್ ವಿಭಾಗದ ಎರಡನೇ ಸ್ಥಾನ ಸ್ಥಳೀಯ ರೇಸರ್ ನಿಗೆಲ್ ಥಾಮಸ್ ಗೆದ್ದುಕೊಂಡರು. ನಿರ್ಮಲ್ ಉಮಾಶಂಕರ್‌ ಅವರಿಗೆ ಮೂರನೇ ಸ್ಥಾನ ಲಭಿಸಿತು. ಜೂನಿಯರ್ ವಿಭಾಗದ ಎರಡನೇ ಸ್ಥಾನ ಗುವಾಹಟಿಯ ಜೇಡನ್ ಪರಿಯತ್ ಪಾಲಾದರೆ ಬೆಂಗಳೂರಿನ ಇಶಾನ್ ಮಾದೇಶ್ ಮೂರನೇ ಸ್ಥಾನ ಗಳಿಸಿದರು. ಪುಣೆಯ ಅರಾಫತ್ ಶೇಕ್ ಮತ್ತು ಬೆಂಗಳೂರಿನ ಜರಾ ಮಿಶ್ರಾ ಅವರು ಕೆಡೆಟ್ ವಿಭಾಗದಲ್ಲಿ ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನ ಗಳಿಸಿದರು.
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
