ಶಾಂಘೈ: ಸರ್ಬಿಯಾದ ನೊವಾಕ್ ಜೊಕೊವಿಚ್, ಶಾಂಘೈ ಮಾಸ್ಟರ್ಸ್ ಟೆನಿಸ್ ಟೂರ್ನಿಯಲ್ಲಿ ಮೂರನೇ ಸುತ್ತು ಪ್ರವೇಶಿಸಿದ್ದಾರೆ.
ಮಂಗಳವಾರ ನಡೆದ ಪುರುಷರ ಸಿಂಗಲ್ಸ್ ವಿಭಾಗದ ಎರಡನೇ ಸುತ್ತಿನ ಹಣಾಹಣಿಯಲ್ಲಿ ನೊವಾಕ್ 6–3, 7–5 ನೇರ ಸೆಟ್ಗಳಿಂದ ಫ್ರಾನ್ಸ್ನ ಜೆರೆಮಿ ಚಾರ್ಡಿ ಅವರನ್ನು ಪರಾಭವಗೊಳಿಸಿದರು. ಇದರೊಂದಿಗೆ ಚಾರ್ಡಿ ವಿರುದ್ಧದ ಗೆಲುವಿನ ದಾಖಲೆಯನ್ನು 12–0ಗೆ ಹೆಚ್ಚಿಸಿಕೊಂಡರು.
ಈ ವರ್ಷ ನಡೆದಿದ್ದ ವಿಂಬಲ್ಡನ್ ಮತ್ತು ಅಮೆರಿಕ ಓಪನ್ ಟೂರ್ನಿಗಳಲ್ಲಿ ಪ್ರಶಸ್ತಿ ಜಯಿಸಿದ್ದ ನೊವಾಕ್, ಚಾರ್ಡಿ ವಿರುದ್ಧ ಪ್ರಾಬಲ್ಯ ಮೆರೆದರು. ಮೊದಲ ಸೆಟ್ನ ಆರಂಭದ ಆರು ಗೇಮ್ಗಳಲ್ಲಿ ಎದುರಾಳಿಯಿಂದ ಪ್ರತಿರೋಧ ಎದುರಿಸಿದ ನೊವಾಕ್ ನಂತರ ಮೋಡಿ ಮಾಡಿದರು. ಶರವೇಗದ ಸರ್ವ್ ಮತ್ತು ಆಕರ್ಷಕ ಹಿಂಗೈ ಹೊಡೆತಗಳ ಮೂಲಕ ಚಾರ್ಡಿ ಅವರನ್ನು ಕಂಗೆಡಿಸಿದರು.
ಎರಡನೇ ಸೆಟ್ನಲ್ಲಿ ಜಿದ್ದಾಜಿದ್ದಿನ ಪೈಪೋಟಿ ಕಂಡುಬಂತು. ವಿಶ್ವ ಕ್ರಮಾಂಕ ಪಟ್ಟಿಯಲ್ಲಿ ಮೂರನೇ ಸ್ಥಾನ ಹೊಂದಿರುವ ನೊವಾಕ್ 11 ಮತ್ತು 12ನೇ ಗೇಮ್ಗಳಲ್ಲಿ ಮಿಂಚಿನ ಆಟ ಆಡಿ ಗೆಲುವಿನ ತೋರಣ ಕಟ್ಟಿದರು. ಈ ಹೋರಾಟ 83ನಿಮಿಷ ನಡೆಯಿತು.
ಇತರ ಪಂದ್ಯಗಳಲ್ಲಿ ಮ್ಯಾಥ್ಯೂ ಎಬ್ಡೆನ್ 6–4, 6–7, 7–6ರಲ್ಲಿ ಡಾಮಿನಿಕ್ ಥೀಮ್ ಎದುರೂ, ಕೈಲ್ ಎಡ್ಮಂಡ್ 7–5, 6–3ರಲ್ಲಿ ಫಿಲಿಪ್ ಕ್ರಾಜಿನೊವಿಚ್ ವಿರುದ್ಧವೂ, ನಿಕೊಲಸ್ ಬಶಿಲಸ್ವಿಲಿ 6–2, 6–2ರಲ್ಲಿ ಡೆನಿಶ್ ಶಪೊವಲೊವ್ ಮೇಲೂ ಗೆದ್ದರು.