ಕೊಂಬೆ ಬಿದ್ದು ಸ್ಕೂಟರ್ ಸವಾರ ಸಾವು

ಕುಣಿಗಲ್‌ನ ಕಿರಣ್, ಅಕ್ಕ–ಭಾವನ ಜತೆ ಕೆಂಪಾಪುರದ ಕಾಫಿಬೋರ್ಡ್‌ ಜಂಕ್ಷನ್ ಬಳಿ ನೆಲೆಸಿದ್ದರು. ಮರಿಯಣ್ಣನಪಾಳ್ಯದ ‘ಡಿಟಿಡಿಎಕ್ಸ್‌ ಏಜೆನ್ಸಿ’ಯಲ್ಲಿ ಕೊರಿಯರ್ ಕೆಲಸ ಮಾಡುತ್ತಿದ್ದ ಅವರು, ಸಂಜೆ 5 ಗಂಟೆ ಸುಮಾರಿಗೆ ಏಜೆನ್ಸಿಯಿಂದ ಕೊರಿಯರ್ ತೆಗೆದುಕೊಂಡು ಅಮೃತಹಳ್ಳಿ ಕಡೆಗೆ ಹೋಗುತ್ತಿದ್ದರು.

ಇದನ್ನೂ ಓದಿ:ಗುಡುಗು–ಸಿಡಿಲಿನ ಆರ್ಭಟ: ಚುನಾವಣಾ ಕಾವಿಗೆ ತಂಪೆರೆದ ಮಳೆ

ಯೋಗೇಶ್‌ಕ್ರಾಸ್‌ನಲ್ಲಿ ತಿರುವು ಪಡೆದು ಮುಖ್ಯರಸ್ತೆಯಲ್ಲಿ ಸಾಗುತ್ತಿದ್ದಾಗ, ರಸ್ತೆ ಬದಿಯ ಮರ ಮುರಿದು ಅವರ ಮೇಲೆ ಬಿದ್ದಿತು. ಇತರೆ ವಾಹನಗಳ ಸವಾರರು ತಕ್ಷಣ ಅವರನ್ನು ಆಸ್ಪತ್ರೆಗೆ ಕರೆದೊಯ್ದರು. ಆದರೆ, ತಲೆಗೆ ಗಂಭೀರ ಪೆಟ್ಟಾಗಿದ್ದರಿಂದ ಮಾರ್ಗ ಮಧ್ಯೆಯೇ ಕೊನೆಯುಸಿರೆಳೆದರು ಎಂದು ಅಮೃತಹಳ್ಳಿ ಪೊಲೀಸರು ಹೇಳಿದರು.

‘ರಸ್ತೆ ಬದಿಯ ಮರಗಳು ಒಣಗಿದ್ದು, ಆಗಾಗ್ಗೆ ಕೊಂಬೆಗಳು ಮುರಿದು ಬೀಳುತ್ತಿರುವ ಬಗ್ಗೆ ಸ್ಥಳೀಯರು ಬಿಬಿಎಂಪಿ ಅಧಿಕಾರಿಗಳಿಗೆ ಈ ಹಿಂದೆಯೇ ದೂರು ಕೊಟ್ಟಿದ್ದರು. ಆದರೂ, ಯಾವುದೇ ಕ್ರಮ ತೆಗೆದುಕೊಂಡಿರಲಿಲ್ಲ. ಹೀಗಾಗಿ, ಬಿಬಿಎಂಪಿ ಅಧಿಕಾರಿಗಳ ವಿರುದ್ಧ ನಿರ್ಲಕ್ಷ್ಯ ಆರೋಪದಡಿ ಪ್ರಕರಣ ದಾಖಲಿಸಿಕೊಂಡಿದ್ದೇವೆ’ ಎಂದು ಪೊಲೀಸರು ಮಾಹಿತಿ ನೀಡಿದರು.

ಇದನ್ನೂ ಓದಿ:ಅಕಾಲಿಕ ಮಳೆ, ಬಿರುಗಾಳಿಗೆ 50 ಬಲಿ